مشكلة تذكرتي..مين الي غلطان؟!

مقدمة:

خلينا الاول نتكلم و نقول ليه بنعرض الموضوع ده معاكم .. منصه قومي يهمها كل ما ليه علاقة بالدولة المصرية الي ديما عايزين نشوفها في احسن حال ممكن.

بصراحه موضوع كرة القدم و حضور الجماهير امر اصبح في منتهي الحساسية تحول من مجرد انك بتقضي يوم جميل حلو في الاستاد عشان تشجع الي كابوس بالمعني الحرفي .

للآسف الدولة المصرية مرت بظروف و احداث في ملاعبها يمكن مفيش دولة محيطة مرت بيها و ده ادي في الاخر الي موت شباب من اخوتنا في 2012 و 2015 .

الحدثين بتوع بورسعيد و مبارة الزمالك تركوا طابع سئ جدا جدا في نفوس الشعب المصري من ساعتها تقريبا اصبحت المدرجات في الملاعب المصرية في مباريات الاندية فاضية و تم منع الجمهور خوفا ان حاجه تحصل زي كده تاني

وده طبعا ادي الي تدهور كبير في حال الكرة المصرية وسوء نتائج و مدرجات فاضية بس الجهات الامنية شافت ساعتها و مع الاحداث العصيبة الي البلد كانت بتمر بيها من ارهاب جماعه الاخوان التكفيرية و استغلالها للشباب ان ده انسب حل لحقن الدماء في الملاعب المصرية المتوترة اصلا.

وتلي ده حل روابط الاندية الي بتسمي الالتراس يوم 16 مايو 2015 ومنعها رسميا بسبب ان بعض روابط الاندية دي كانت علي علاقة بحركة حازمون بقيادة حازم صلاح ابو اسماعيل و كابو الحركة و بقوا ينظموا مظاهرات و نزلوا رابعه فالدولة شافت ان الحل الافضل للسيطرة هي الحل .. حل الروابط يعني وده كان بشكل نهائي عام 2018.

وبعد مرور 8 سنين تقريبا من استقرار الاوضاع و القضاء علي الارهاب اتسمح برجوع الجمهور في مباريات الدوري و دوري ابطال افريقيا بشكل تدريجي 5الالاف مرة 10 الالاف مرة لحد الحمد لله السنه دي اتلعب كذا ماتش بالسعه الكاملة تقريبا

نيجي بعد كل ده عايزين نبوظ الشكل الجميل الي في المدرجات عشان شوية عيال؟!.

أيه الي حصل بالظبط ؟

المبارة الاولي

البداية من مبارة الاهلي و الهلال السوداني الي كانت في القاهرة و ياريت يجماعه نركز في التفاصيل الحضور تقريبا 50الف متفرج او اكتر من استاد السعه الرسمية بتاعته 75 الف المبارة ماشية بشكل اكتر من روعه الجمهور بيغني وبيتفاعل شباب التالته شمال و الي علي السماعات بيقودهم بيغنوا معاهم و الاهلي عمل ماتش جميل وخلص 3/0 و الكل حرفيا رجع مبسوط و الامن كان منظم كل حاجه.

للاسف الشديد بعد المبارة خرج فيديو مفرك عبيط علي صفحات الاخوان المسليمن و رجلهم بيتقال فيه ان جمهور الاهلي شتم وزارة الداخلية وده الي نفته الوزارة علي صفحتها و اشادة بالتزام الجمهور العظيم وتشجيعه لفريقة.

المبارة التانية

الاهلي و غزل المحلة الي الاستاد مكنش فيه غير التالته شمال بنفس الشباب علي السماعات بتوع مبارة الهلال و حوالي 10 الالاف متفرج و المبارة كانت قمة الروعه و الاهلي كسب و الامن تمام و الشباب رجعت بخير وكلة مفيش افضل من كده و جمهور الاهلي العظيم شجع بدون مشاكل

المبارة التالته نهائي كاس مصر

الاهلي و بيراميدز عدد جماهير الاهلي تقريبا من 25 الف ل 30 الف متفرج التالته شمال موجودة بنفس الشباب بتوع الهلال و المحلة هما هما تشجيع عظيم الكل متفاعل وانتهت المبارة بدون اي مشاكل تذكر و الجمهور حرفيا شجع بطريقة اكتر من روعه شباب في منتهي الجمال و التنظيم.

المبارة الرابعه الاهلي و فاركو

الحضور الجماهيري المعتاد من التالته شمال حوالي من 5 ل 10 الالاف متفرج بنفس الشباب الي بيقود التشجيع لكن و للاسف الشديد بعض من جماهير الاهلي شتمت شيكابالا بدون اي مبرر ومن لا شئ وده ادي الي احتقان شديد علي السوشيال ميديا الي هو اساسا سبب الكوارث الي حصلت التعصب و الحشد الجمهوري انت دلوقتي فريقك كسبان و بتلاعب فاركو ايه الي جاب سيرة شيكابلا دلوقتي !

الماتش الخامس ماتش الرجاء المغربي و بداية المشكلة:

يبدأ الكلاش بين الجمهور و المنظميين بدخول "بعض" من جماهير الاهلي بشماريخ و صواريخ طب سؤال انت عارف ان الجهه المنظمه مانعه الكلام ده ليه بتهرب الممنوعات دي من الاول هو تشغيل دماع و مشاكل و خلاص ؟! يعني للناس الي بتعمل كده انتوا بدايه خلق المشكلة !

طبعا تم التعامل مع الشباب دي و التحفظ علي الممنوعات الي معاهم الي علي فكرة احنا مش الواحدين الي بنعمل كده الالعاب النارية ممنوعه في انجلترا و اسبانيا و لاحقا ايطاليا علي قد ما بيقدروا فانت ليه تشغل دماغك و تكسر القوانين و تظلم غيرك!

دخل الجمهور باعداد تقارب ال 50 ل 60 الف متفرج حصل اشياء مخجلة في البدايه و ده علي عهدة ناس حكوا لكابوا التراس اهلاوي سابقا ابو علي ان بعض الشهود قالو له ان في عدد من الجماهير دخلوا الاستاد بعد ما كسروا بوابات و بدون اي اثبات هوية و لا تفتيش.

وهنا عايزين ننوه لحاجه يا شركة تذكرتي يا شركة يا افريقية يا منظمة لمباريات دوري ابطال افريقيا الرحمة شوية بالجمهور الناس دي جايه تفرح و تنبسط و تشجع مش تتكدر و تتعذب حقك جدا مراجعه البيانات و التفتيش بس ياريب ب اليات اسرع من كده و اذكي احنا مش بنعذب و بنعاقب الشباب عشان جايين يتفرجوا علي مبارة!

في التالته شمال لما الشباب بتوع القيادة هيطلعوا جنب السماعات عشان يقودوا التشجيع خرج بعض الهتفات من شباب " شمال يمين طلعوا المرشدين" و سباب في وزارة الدخلية طب هل ده يعقل؟ انا مش فاهم انتوا عندكوا دم؟ مش كفايه الي حصل تاني هنعيد الشغب و الشتايم و العنف و التكسير و المسيل للدموع؟ يجدعان ارحمونا بقي مش عشان 50 واحد متخلف يتضر بسببكو 50 الف شاب بيشجع بمنتهي الاحترام المهم حصل حدف ازايز وشتايم لحد الشباب الي هما بيقولوا عليهم مخبرين نزلوا و مشيوا.

واكن العيال دي بعقليتهم الساذجة الامن محتاج مرشدين في الاستاد حبيبي افهم انت من ساعه ما رجلك بتتدخل استاد القاهرة لحد المدرج كل ده متراقب و ده العادي في اي مكان في الكرة الارضيه يا مدعي المظلومية في الكامب نو الينز ارينا بيرنابيو اي استاد لازم يكون فيه ادوات للامن مش انت اينشتين زمانك الي هتعترض يعني!

فده للاسف الشديد وبناء علي الكاميرات انتشر ناس من المباحث في الاستاد و خدوا كارينهات التشجيع من الشباب المشاغب في منظر مؤسف هما الي كانو السبب فيه!

احنا عايزين نعرف مين مصلحته يرجعنا خطوات ورا و ندخل في نفس الدوامة القذرة الي كانت من 10 سنين هترتاحوا لما الجمهور يتمنع تاني عشان شوية عيال غيرانه من بعض و كل واحد عايز يعمل فيها كابو ويطلع!

واحنا هنا لينا تعقيب تاني عشان مفيش حد من خونة الخارج يستغل المشاهد دي تاني كان لازم 3 او 4 عناصر من امن الاستاد هما الي يرحوا يسحبوا الكارنيهات هنا بقي لو حصل مقاومة او رفض تتدخل المباحث لان الفيديو للاسف مش لطيف ابدا و انتشر و جماعه الاخوان و السوشيال ميديا بتاعتها استغلته اسوء استغلال.

وهنا نسرد لاي حد من المسؤليين لو بيقرأ حادثه حصلت في ملعب برشلونه في مبارة برشلونة و اتليتكو مدريد حد من جماهير اتليتكو حط علم فريقه علي لوحه اعلانات راعي برشلونه و ده ممنوع و حاولوا يمنعوه ولما قاوم ده امن الاستاد باليونيفورم الموحد بتاعهم طلع خدوا العلم و المشجع و كان المنظر هيبقي الطف لو حصل كده.

طبعا حصل بعد كده علي عهدة اشخاص مسؤليين من النادي الاهلي حكوا لابو علي ان حوالي 45 حد من المشاغبين في نيابة مدينة نصر.. السؤال هنا انت بخروجك عن النص ايه الي استفدته ؟ عايز تيجي الاستاد عشان تشجع من قلبك و تقضي وقت جميل اهلا لكن هتشتم و تكسر ملكش مكان !

الهجوم علي تذكرتي:

بصراحه من الحجات المضحكة جدا الي بلاقيها هي الهجوم علي فكرة تذكرتي شئ في منتهي السذاجة انك تلاقي يوتيوبر اهلاوي مشهور يقولك انا عايز تبقي زي ايام زمان التذاكر تنقطع من عند بوابات النادي الاهلي بدون هوية و لا تفاصيل و نخش كده زي البهايم فسؤالي هنا شفت الكلام ده بيحصل فين ده دول الموز مبقاش فيها الكلام ده انت عشان تحجز تذكرة لاي مبارة في الدوري الاسباني او الانجليزي لازم بيانات و معلومات عنك امال ادخل اي حد كده هي زريبة يا ابني فده يوضحلك عقليات الناس المتصدرة المشهد ازاي لكن هل ده يجعل شركة تذكرتي فوق النقد لا طبعا و تعالو للخاتمه عشان نفهم.

الخاتمة:

مين الغلطان ؟ الصراحة جميع الاطراف حرفيا بدون اي دبلوماسية.. ازاي؟! .. نشوف

شركة تذكرتي:

شق حجز التذاكر:

احنا في 2023 و لسه معندكمش ويب سايت للحجز متطور ذنب ايه الناس تقعد ساعات مستنية الموقع يشتغل عشان يحجزوا ! ايه قمة التخلف ده لازم يتم تطوير الموقع لاستيعاب الجمهور عشان حجز التذاكر دولة زي مصر مينفعش يكون موقع الشركة المسؤلة عن تذاكر مباريتها بالشكل المتخلف ده.

شق تنظيم دخول الجمهور مع الشركات المسؤولة

يجماعه دول شباب محترم جايين من محافظات عشان ينبسطوا ويشجعوا مش عشان يتهانوا ويتعذبوا لازم اجراءات دخول الاستاد و التفتيش الي احنا بندعمها جدا عشان الانضباط تكون اسرع من كده ده عذاب الي بيحصل ده الشباب يقفوا بالساعات في البرد و الحر عشان ماتش كرة افتحوا اكتر من بوابه انشروا امن اكتر يعني لاز تتصرفوا مينفعش 50 او 60 الف يدخلوا من عدد بوابات محدود لازم نتحرك في ده.

بالنسبة للبنارات و مين يطلع يشجع و يقود الناس فدول نقطتين في منتهي الاهمية و فيهم حساسية شديدة و احنا هنا بنخاطب ادارة النادي الاهلي انها تكون الطرف الوسط و المسؤل عن طريق اقامه اجتماعات دورية ما بين الامن و بعض العناصر من الشباب المشجع الي عنده قبول عند الجماهير و متوافق عليه امنيا اهمية الاجتماع ده يكون فيه تنسيق مين الي يطلع ويقود و ان بنارات التشجيع الي هتيجي مع الشباب دي تكون تحت اشراف ادارة النادي الاهلي عن الي مكتوب فيها يكون مقتصر علي عبارات تشجيعية للفريق مش اي حاجة تانية و تدخل تتحط في المدرجات قبل المبارة بيوم بعد عرضها علي ادارة الاهلي و الامن لازم ادارة الاهلي يكون ليها دور اكبر لو عايزة تنقذ الموقف .

الامن

السادة القائمين علي الامن احنا بنحط ايدنا في ايد بعض عشان المباريات تطلع بشكل حضاري و راقي زي ما بنشوف في اوروبا للاسف الفيديو المخجل بتاع الكارينهات اتروج ليه جامد عند لجان الجماعه القذرة و ده بيأثر في الشباب احنا بنقترح ان اي تجاوز يحصل من اشخاص في المدرجات اول جهه تتعامل معاه هي امن الاستاد لو حصل تصعيد الوزارة باجهزتها تتدخل لكن للاسف الفيديو كان مخجل جدا.

الجماهير:

فكرة تذكرتي مش ابداع مصري و اختراع ده النظام في اي استاد علي وجهه الارض لازم الي يدخل الاستاد يتعرف مين ده عشان امني و امنك عايز تيجي الاستاد و تطلع كل طاقتك في التشجيع و مساعدة الفريق او حتي والله للهجوم عليه لو خذلك هيبقي اهلا وسهلا لكن لو في اشخاص عايزة ترجع للسب و التكسير و التوليع و القنابل المسيلة انسي و تستاهل اي حاجه تحصلك و ابقي افرح بشوية السذج الي من نفس عقليتك الي هيتعطفوا معاك كفايه شبابنا الي راح كفايه دم ايوه الكورة للجمهور مش للبلطجية وابقي في اخر كل يوم كده و انت بتشتم بلدك و بتقول ياريتنا زي اوروبا ابقي شوف الناس في اوروبا الغربية بيشجعوا ازاي و الرقي الي عندهم و من غير التراس علي فكرة!

بالمناسبة و علي عهدة الصحفي كريس ويتلي المقرب من ارسنال في حد من جماهير ارسنال عنده 21 سنة تم اعتقاله في مبارة ديربي لندن مع تشيلسي عشان بس مجرد سلط ليزر علي لاعب تشيلسي مودريك .. تمام؟!