اشمعنا؟ اشمعنا القومية المصرية دايما هي المرفوضة؟ بتتعرض دايما لحملات تشويه وتكفير للناس اللي بتتبنى الفكر القومي. الموضوع كبير بل وممنهج كمان.
انت عندك دولة زي تركيا مثلا بتعتز بقوميتها وتاريخها (رغم أنه تاريخ دموي) وكل الاتراك بيفتخروا بيه وكل سنة بيعملوا احتفالات كبيرة باليوم الوطني ويوم تأسيس الجمهورية التركية بل وبعض المصريين كمان بيفتخروا بيه وبالاحتلال العثماني كمان بحجة أنه تاريخ إسلامي.
ودولة زي السعودية اخترعت ليها قومية خاصة بيها وبقوا يحتفلوا باليوم الوطني السعودي اللي كان من كام يوم بالمناسبة وكانت الشوارع السعوديه كلها مضاءة باللون الاخضر اللي بيرمز للملكة، رغم أنها برضه دولة إسلامية وهي دولة الكعبة والنبي محمد. وإنها دولة حديثة 92 سنة بس اخترعوا ليهم قومية وبقا عندهم انتماء ليها وبيدافعوا عنها ويحتفلوا بيها.
دولة برضه زي المغرب والجزائر مش بينسبوا نفسهم للعرب بل بيقولوا انهم امازيغ وبيعتمدوا التقويم الأمازيغي وبيتكلموا اللغة بتاعتهم عادي جدا مع أن المغرب والجزائر برضه دول إسلامية.
طب تعالى هنا بقا عند القومية المصرية والوطنية، تيجي تفتخر بالمصريين القدماء يقولك لا دول كفار تيجي تقوله المصريين مكانوش ساكتين على ظلم الرومان يقولك كنتوا عبيد عندهم والعرب خلصوكوا منهم
تحب بقا تقول ثورة يوليو وتأسيس الجمهورية والخلاص من الاحتلال البريطاني يقولك كنا بنسلف بريطانيا والموضة كانت ف القاهرة قبل فرنسا وحكم العسكر ومعرفش ايه.
تيجي تقول هحتفل بنصر اكتوبر العظيم يطلع واحد بنفسجي يحمل الجنسية المصرية يقولك احنا مكسبناش حرب اكتوبر والثغرة (هنتكلم بالتفصيل عنها وعن اكتوبر الشهر الجاي شهر الانتصارات)
تقوله هحيي ذكرى ثورة 30 يونيو وخلاص مصر من التنظيم القذر يقولك انقلاب. اي حاجة ليها علاقة بالوطنية أو القومية المصرية يكرهك فيها ويحاربها. علشان كدا لازم تنفض ودانك منهم وتفتخر بكل اللي قولنا عليه ده بقلب جامد.
يجي هنا دورك علشان تقولنا انت شايف ده بيحصل ليه؟ ومين اللي ورا الكلام ده؟ مستنيين رأيكوا في الكومنتات.
Comments