الصناعات العسكرية المصرية .. الجزء الأول المدرعات

في كتير مننا ميعرفش حاجة عن الصناعات العسكرية المصرية وبيقول هو احنا ليه مش بنصنع سلاحنا؟ والبعض الآخر بيصطاد في المية العكرة زي م بيقولوا وبيدس السـ.م في العسل وبيقول اننا منقدرش نصنع وأننا منعرفش نعمل حاجة والكلام ده.

هنا بقا احنا جايين نصحح المفهوم الخاطئ ده ونتكلم شوية عن الصناعات العسكرية المصرية. وهيكون البوست متقسم لأجزاء حسب أنواع الأسلحة.

والجزء الأول عن المدرعات المصرية:

مصر بتصنع المدرعة "فهد" اللي بتتصنع في مصانع الهيئة العربية للتصنيع. المدرعة في منها اكتر من نسخة ومنها اللي بيعمل لصالح الشرطة المدنية ومنها لصالح القوات المسلحة.

تسليح المدرعة دي بيتكون من مدفع إلى ٣ مدافع رشاش 7.62 مم وسرعتها توصل لـ100 كم/س. بتستخدم في مكافحة الشغب أو التدخل السريع أو المعارك العسكرية ونقل الجنود. الهيئة العربية للتصنيع بتصدر كمان المدرعة دي لعدة دول بالإضافة لخدمتها في العسكرية المصرية، ومن الدول دي:

• الجزائر

• بنجلاديش

• الكويت

• عمان

• السودان

المدرعة "تمساح" بإصداراتها المختلفة المضادة للألغام والكمائن ومن استخداماتها حماية القوافل، والدوريات الحدود، ومكافحة التمرد، ونقل القوات، والإجلاء الطبي، مكافحة الارهـ.اب، العمليات الخاصة. تسليح المدرعة مدفع 7.62 أو 12.7 مم وسرعتها توصل لـ110 كم/س. بتصنع المدرعة دي كمان في مصانع الهيئة العربية للتصنيع.

في كمان المدرعة "سينا ٢٠٠" اللي بتتصنع في مصنع 200 الحربي. تعتبر المدرعة نظيرة المدرعة الروسية BMP مزودة بنظام دفاعي للحماية من قذائف الـRPG مسلحة بمدفع رشاش عيار 12.7 مم وتتحمل قذائف المدفعية عيار 155مم على بعد 30 متر وسرعتها توصل لـ65 كم/س.

المدرعة "ST-500" المدرعة الخفيفة من انتاج مصنع 200 الحربي. تستخدم المدرعة في اكتر من استخدام زي نقل الجنود او عمليات القوات الخاصة او الإسعاف أو الإطفاء. ممكن تسليح المدرعة بمحطة السلاح العاملة بالتحكم عن بعد والمزودة برشاشات متعددة الاعيرة او قواذف قنابل عيار 30 مم او قاذف صواريخ مضادة للدبابات او حاملة للهاون بخلاف قواذف الدخان. وسرعتها القصور توصل لـ140 كم/س.