الصناعة والمدن الجديدة

كتير من الناس بيقول هي فلوسنا وفلوس الدولة كلها رايحة على المدن الجديدة طب ما بدل المدن دي نعمل مصانع ونزود الإنتاج. هنتكلم في البوست ده عن الصناعة في مصر في الفترة الأخيرة بالأرقام وهنخلي موضوع المدن الجديدة في وقت تاني لو عايزين.

خلينا نبدأ بعدد المجمعات الصناعية والوحدات الصناعية اللي اتعملت في مصر اخر 8 سنين واللي وصل عددها إلى حوالي 17 مجمع صناعي و 5046 وحدة صناعية بتكلفة حوالي 10 مليار جنيه والعدد ده هيوفر 48 فرصة عمل مباشرة غير الفرص الغير المباشرة.

وامبارح أعلن رئيس الوزراء عن وصول الصادرات المصرية الغير بترولية إلى 53.8 مليار دولار من ضمن خطة الدولة المصرية للوصول إلى 100 مليار دولار صادرات. بعد م كانت الصادرات المصرية في 2021 حوالي 45 مليار دولار بس.

كمان امبارح أعلنت شركة بيراميدز عن أول دفعة من إنتاجها لكاوتش العربيات ومن المقرر أنها تخدم السوق المحلي وتتجه للتصدير لدول منها الولايات المتحدة الأمريكية. وفي نفس اليوم امبارح انتجت أول عربية BMW في مصر بنسبة تجميع محلي 40%. ده غير موبايلات سامسونج وانفنيكس اللي مصانعهم في مصر دلوقتي، ده غير اوبو وشاومي اللي هيفتحوا مصانع. غير كمان التلفزيونات اللي بتتصنع وتتصدر لدول زي السعودية والمغرب بنسبة تصنيع محلي 80%

كمان احنا قريب هنفتتح أكبر مصنع في افريقيا لتصنيع ماكينات CNC لإنتاج 100 ماكينة في السنة. والمصنع ده هيوفر لمصر حوالي 500 مليون يورو كنا بنستورد بيهم الماكينات دي.

وقريب كمان هيفتتح رئيس الجمهورية أكبر مصنع للغزل والنسيج على مستوى العالم بطاقة إنتاجية 30 طن غزل يومياً وعلى الطريق الموازي بتقوم الدولة بتطوير مصانع الغزل القديمة.

وعلى الهامش احنا دلوقتي بنصنع اتوبيسات وفي شهر أكتوبر اللي فات صدرنا ل5 دول 48 مركبة بقيمة 6.1 مليون دولار. بالإضافة لنمو قطاع الصناعة 40% اخر 3 سنين

وفي كمان مدينة صناعية كبيرة اسمها مدينة طربول في محافظة الجيزة طربول دي عملاق الصناعة المصرية استنوا عنها مقال.

وعلى فكرة عارف ان في ناس هتيجي دلوقتي وتقول انتوا صفحة قومية مش دولجية، هو علشان احنا قوميين يبقا لازم نتكلم عن السلبيات بس؟ لازم ننتقد ونعارض بس ي أما نبقا دولجية؟ القوميين على فكرة لازم يبرزوا إيجابيات وإنجازات دولتهم مع الكلام عن السلبيات بطريقة النقد البناء.