القايمة سبب من أسباب الطلاق!

كمتابعة منا للقضايا اللي تهم المجتمع المصري مبسوطين جداً بترند القايمة، اللي ألقى الضوء على كارثة مسببة لملايين المشاكل في الزواج.

الموضوع كله بيبدأ لما بيحس الولد والبنت بانجذاب طبيعي نتيجة الفطرة اللي ربنا خلقنا بيها، ويتفاهموا مع بعض ويكون في كيميا، وخلاص عايزين الأمور تمشي في نطاقها الطبيعي، فتيحي مرحلة الجواز.

وهنا يدخل أهل العريس لأهل العروسة ويطلبوا ايد بنتهم ربة الصون والعفاف، يقوم أبو العروسة اللي شايف بنته حلوة أكتر من باقي البنات وماينفعش تتساوى بيهم (مادياً) فيطلب من العريس طلبات خرافية هو نفسه لما اتجوز مقدرش يجيب عشرها.

شقة تمليك سعرها يتعدى ال ٥٠٠ ألف عفش من أحدث بيوت الأثاث الأوروبية تتناسب مع جذور عائلتهم الارستقراطية، حيث كان جدهم شغال على عربية حنطور بيوصل بيها سكرتير الباشا كل يوم لمكان عمله ماعدا الأعياد والعطلات الرسمية، بالإضافة لعشرات الآلاف من الهدايا العينية والمادية.

ام العريس تقول لابنها قوم يا واد الناس دي مش بتاعت جواز، بس الواد عايز البت والبت عايزاه، يقوم ابوه يغمزله ويقوله ماتقلقش هاظبطهالك، ويردلهم الصاع صاعين ويطلب منهم قايمة خرافية مجابتهاش الأميرة ديانا نفسها، وكل الأطراف تضغط على نفسها وتعصر ٤٠ كيلو ليمون عشان يعدو الموضوع.

لكن خلال العمليات المرهقة (ماديا وبدنيا ومعنوياً) بيتم استنزاف اسرتين بكل غباء، والبنت بتكون مقتنعة ان العريس لازم يتعب عشان يقدر قيمة النعمة اللي في إيده، بينما العريس بيفضل طول الفترة دي يصبر نفسه بأحلام المراهقة والفوائد الجمة اللي هتعود عليه من الجواز، وده بيرفع من سقف طموح الاتنين لمراحل خرافية ملهاش علاقة بالواقع.

ربنا يكرمهم ويوصلوا للجواز وساعتها بتقع كل الأوهام السابقة تحت الاختبار ويسأل العروسين بعد كام يوم سؤال مهم، هو الموضوع كان مستاهل؟؟

كان مستاهل كل الخناقات دي على حاجات هتتشال لحد ما العريس والعروسة دول يموتوا من غير ما يستخدموها؟؟

كان مستاهل كل التحكمات من الأهل والتدخل والمشاكل على كل كلمة؟؟

كان مستاهل المصاريف غير المعقولة اللي اندفعت عشان يعملوا بيت ويكونوا اسرة؟؟

الإجابة قطعاً لأ، ولا مستاهل ولا كان ايه لازمة كل اللي حصل ده، طب بنعمله ليه؟ لزوم الفشخرة والأنعرة اللي بتعمل شحن للعريس والعروسة ضد بعض وضد أهلهم وبتزود من المشاكل وتقلل التفاهم جدا بين الطرفين.

طب والحل؟

الحل اننا نبقى منطقيين، مبنقولش ان البنت تتنازل عن حقها ولا إن الجواز يبقى من غير تكاليف، لكن في المعقول، الفلوس اللي بتتدفع في حاجات ملهاش لازمة بتخرب البيت بعد كده، نتفاهم ونتفق بهدوء وسهولة ونساعد الشباب يبنوا نفسهم بنفسهم، هنستفيد ايه بالنيش اللي فيه طباق ماضي عليها نابليون بونابارت والزوجين مطلقين وعيالهم متشحططين وراهم؟

ده أكبر عامل من اللي بيسببوا الطلاق، لأنه بيشحن كل الأطراف ضد بعضها، التعامل في المواضيع دي بالعند والندية غلط، لازم يكون بالتفاهم والمحبة عشان نقدر ندعم مجتمع فيه أمراض نفسية أقل.