انتشار الدونية تجاه التاريخ المصري

ليه فيه دونية تجاه تاريخنا القديم و نحية حضارتنا المصرية القديمة بطرق وأشكال مختلفة ؟

ببساطة احنا بنعيش ف عصر القوميات ، حصل ده ف اوربا و بدأ يجى نحيتنا واحدة واحدة وظهر بداية من فك الارتباط بين مصر وبين المحيط العثماني بالذات و تأكد ده بعد تفكك الدولة العثمانية

و قيام الدول المحيطة من حولها كدول مستقلة حديثة مش كدول قديمة ، وبدأت النزعة القومية الوطنية تزيد واحدة واحدة لحد ما بدأت دعاوى القومية العربية تزيد باتجاه مضاد هو كمان وزاد اكتر بعد نظام دولة يوليو 52 الاتجاه اللى ثبت عدم كفاءته ع عدة مستويات.

لكن واحدة واحدة بدأ وعى الناس يزيد والاهتمام بالتاريخ المصري القديم يزيد خاصة مع تقدم علم المصريات وفرة الكتب بتمن بسيط بعض الشيء مع الدعم الحكومى و غيره ، طب ايه علاقة كل ده بسؤالى اللى فوق ؟

زى ما قلت لك احنا بنعيش ف عصر القوميات وده اللى فهمه جيران لينا وبدأوا يعمقوا الانتماء بقوميتهم وبلدهم وبدأت النزعة اليمينة المتطرفة عندهم تزيد برضه ، بل لم يكتفوا بكده بل بدأوا بمحاولة التأثير ف الداخل المصرى بالذات ف العقل المصرى ، وده عبر طرق و أشخاص عديدة منهم مصريين للأسف بوعى منهم أو بدون وعى

هما مش عاوزين يقوموا لك قومة ، و هنا مدخل التاريخ مهم جدا عشان يتغلغلوا فيه و يلعبوا عبره بالعقل المصرى ، تيجى بقا دعاوى أن حضارتنا مش من صنعنا من صنع قوم عاد ولا فضائيين ولا ناس عاشوا قبلنا ملناش علاقة بيهم واحنا يا عينى سرقنا آثارهم.

نيجى نقول عندنا دلائل تثبت كلامنا و أن حضارتنا من صنعنا زى :

-العثور ع قرية ومقابر العمال بناة الأهرام .

-العثور علي محاجر احجار الأهرام في هضبة الجيزة واللي بتؤكد ان صخور الاهرام اتقطعت بطريقة التفريغ الكتلي مش بطريقة القوالب اللي بيقولوا عليها

-العثور علي برديات ميناء وادي الجرف اللى بتوثق سير العمل في موقع بناء هرم خوفو ، وهنا بناء مش ترميم وانا متكلم عنها هنا قبل كده

- العثور علي محاجر الحجر الجيري في طرة والتي استخدمت احجارها في كساء الأهرام.

-العثور لأول مرة علي نصوص واثار من محجر حتنوب توضح اقتطاع ورفع الكتل الضخمة من الأحجار واستخدام الطريق الطينى الصاعد.

يقولك لاه كل ده هتش ملوش لازمه ولا حاجة

طيب

عندنا نصوص الادب المصري القديم اللى بتملى فراغات تاريخية حصلت زى عدم وجود مومياوات ملوك بقلب الاهرامات رغم أننا لقينا رفات الملك منكاورع و مومياء الملك مرنرع ! عندنا العمارة المصرية القديمة اللى بتوضح تطور البناء في الاهرامات و غيرها

اوحتى عندنا تطور ديانة مصرية قديمة بتوضح ليه ظهرت نصوص الاهرام ف عصر الأسرة الخامسة بالذات مش قبلها ولا بعدها يقولك لا مش دليل برضه ، طب درستوا فنون أو نقوش مصرية قديمة أو حتى شفتوا مقابر العمال أو النبلاء اللى بتوثق كتير لسير العمل في اى بناء معمارى يقولك لاه برضه

طب ليه بعيدا عن افتراض الجهل بكل ده او عدم الرغبة في الكشف أو البحث أو وجود روح حقيقية للتساؤل ، الناس بتستسهل تدور ع المعلومة أو بتدى ودنها لأى حد يقولهم اى كلمتين ف رغيف عشان لا يكلفهم عناء البحث ، اللى هو شاق جدا لو تعلمون ، فبعيدا عن كل ده ، ادعى بكل ثقة أن كل مقصود ، مقصود ليه ؟

عشان ببساطة ف ناس من مصلحتها تفك الارتباط بين المصرى المعاصر و تاريخه الطويل ، بينه وبين أساسه و القاعدة الاولى اللى تشكلت فيه شخصيته و قوميته ، مصر كانت الأمة الاولى بالتاريخ

بمثل ما كانت الدولة الأولى بالتاريخ بمثل ما كانت القومية الأولى بالتاريخ برضه ، فهما مش عاوزين نسترجع كل المعاني دى ولو ف شكل دراسات تاريخية محترمة تعمل ع استرجاع كل المعاني دى ف قلب ووعى كل مصرى ، طيب هى الصورة سواد كده ؟

لا خالص ،بالعكس تماما الاتجاهات الفكرية الحديثة والشباب الواعى

بتاريخه و قيمة بلده كل يوم بيزيد ، الاحساس القومى ببلدنا كل يوم بيزيد ، محاولات إحياء التراث المصري كل يوم بيزيد فى شكل اهتمام باللغة المصرية القديمة أو بخطوطها أو بشكل عمل اغانى أو مسرحيات معتمدة على التاريخ القديم ده ، وبنفس الوقت ده لا يمنع من الإحساس بكل الطبقات المكونة للبلد دى سواء كانت طبقة قبطية مسيحية أو قبطة إسلامية ،لأن كل الطبقات دى شكلت مصر بقدر أو بأخر و هى بتثرى الشخصية المصرية خاصة والمجتمع ككل.