تقرير DW - السلطة الخامسة عن القومية المصرية و تحديدًا صفحة قومي كمثال فاستحملوا معانا لأن الكلام مهم و متكرر رغم الرد.
أولًا يا شباب مبروك ليكم كلكم و لكل اللي دعمنا عشان نوصل لمرحلة إن صوتنا و نكون محل اهتمام الصحافة الأجنبية و المصرية سواء سلبًا أو إيجابًا.
مؤتمر أسوان
التقرير تناول حملتنا بالتعاون مع صفحة وعي - مصر و القومية المصرية بوقف مؤتمر اسوان و اللي بسبب نشرنا للوعي عن خطورة أفكار المركزية الافريقية علي بلدنا و الحرب الثقافية اللي بتتم نجحنا في المعركة دي تحديدًا و المؤتمر اتلغى في اسوان و معاه الرحلة اتاجلت لشهر أكتوبر، الهدف الرئيسي كان توعية المصريين بتاريخهم و حضارتهم مش اخافة اي مسؤول حكومة مع تأكيدنا لرفضنا التام للعنصرية تجاه جميع الأفارقة و ده اللي التقرير مذكروش و ده مش غريب علي صحافة زي دي.
ليست إفريقية ولا عربية ولا إسلامية و إنما فرعونية!
مصر فرعونية
كلام هزلي مخلوط بسوء فهم مقصود لايصال صورة مشوهة عن القومية المصرية، سواء هنا أو علي أي صفحة قومية الخطاب الرسمي هو رفض مصطلح كمتية او فرعونية تمامًا لعدم إختذال تاريخ الشعب المصري في حقبة زمنية معينة! والعكس هو الصحيح فاحنا من ضمن بوستاتنا في موقع التواصل ومقالاتنا كان #اضبط_مصطلحاتك اللي فيه شرحنا للناس ليه اختذال تاريخ الشعب المصري العظيم في كلمة "فراعنة" "فرعونية" شيء مش صحيح. و إنما بنستخدم مصطلح "الهوية المصرية" اللي بيستند للأساس التاريخي و الحضاري للدولة المصرية و الشعب المصري بكل التأثيرات الثقافية اللي بتندرج تحت مظلة هويتنا كشعب مصري..فالمصري يظل مصري بغض التظر عن اللغة لانها مش المعيار الأساسي/الأوحد لتحديد هويات الشعوب.
ليست عربية
القومية المصرية هي النقيض للتيار القومي العربي اللي بينادي بكوننا شعب عربي من المحيط للخليج بثقافة عربية واحدة و بيسعى للوحدة التامة بين الدول بغض النظر عن الطريقة، أما القومية المصرية بتنادي بإن مصر دولة مستقلة و أمة في خد ذاتها لها تاريخها و ثقافتها و هويتها و تراثها تسعى لتبؤ مكانتها وسك الامم و التكامل و التعاون مع الكل سواء الدول العربية او الغير عربية طبقًا لمصلحة الشعب المصري.
ليست أفريقية!
مصر دولة تقع في قارتين، آسيا و أفريقيا و و بحكم غالب النطاق الجغرافي كثر دولة أفريقية و القومية المصرية لا تدعي الانسلاخ من العمق الأفريقي و انما نرفص دعاوي المركزية الأفريقية العنصرية تجاه شمال أفريقية باعتبار أفريقيا قارة ذات عرق واحد زنجي.
الترويج لنظريات المؤامرة و التعليقات العنصرية
طبعا معدّي التقرير متعبوش نفسهم حتى و شافوا مبادئنا و الرد علي كل الإدعائات دي و تأكيدنا لرفض أي تعليقات عنصرية تجاه اي فرد/شعب من أي شخص كان و إن العنصرية مرفوضة قلبًا و قالبًا و منافية لمبادئ القومية المصرية كفكر، طبعًا اي حديث عن ترويج لنظريات المؤامرة ده شيء من وحي خيال المؤلف.
طرد اللاجئين السوريين و الأفارقة
بنأكد مرة و اتنين و تلاتة ان مطالبنا بخصوص ملف اللجوء و الهجرة في مصر هي مطالب شرعية تمامًا لصالح الدولة و المهاجرين و اللاجئين علي حد سواء، فبنأكد علي رفضنا لتوطين المهاجرين و اللاجئين من أي جنسية علي أرضنا وسلبهم من وطنهم الأم أيا كان، و طبعًا مع عودتهم آمنين لكل دولهم بخطة زمنية واضحة اقتداء بالدول الأوروبية، و سبق و اتكلمنا عن حمل استقبال و استضافة ملايين من اللاجئين و المهاجرين في مصر.
القومية المصرية و مناهضة الإستعمار
الفكر القومي المصري بالأساس تبلور في ثورة ١٩١٩ اللي نادت بحاجتين اساسيتين "يحيا الهلال مع الصليب" و "مصر للمصريين" للتأكيد علي أم الفكر القومي المصري يدعو بالأساس لوحدة الشعب المصري و الحفاظ علي سيادته و استقلاليته بغص النظر عن المعتقد او الأصل.
القوميين المصريين أم أبناء كمت؟
الخلط الكبير بين المصطلحين ناتج عن القدرة علي التفرقة الخطاب اللاديني المتطرف اللي بيتبري من الهوية العربية و بيهاجم الاديان مع الخطاب القومي اللي بينبذ التطرف و بيحافظ علي المجتمع المصري بكافة أطيافه تحت مظلة الهوية المصرية.
القومية المصرية بعد سقوط الاسلام السياسي
بدأ يسطع نجم القومية المصرية بعد اضمحلال الاسلام السياسي و فشله في الحكم تمامًا و عدم قدرة أي من الأيديولوجيات الموجودة في الساحة علي تقديم فكر حقيقي لصياغة رؤية لدولة مصرية جديدة تتبوأ مكانتها حضاريا و سياسيا و ثقافيا و اقتصاديا وسط الامم سوى الفكر القومي الذي نادى به كبار الشخصيات المصرية أمثال طه حسين و احمد لطفي السيد بضرورة عن الانتساب لأي شعوب او أمم اخرى و ان مصر لهم ثقافتهم و هويتهم و تاريخهم الحضاري العظيم بحانب التأثيرات الثقافية من الحضارات الأخرى كلٌ تحت مظلة الهوية المصرية الجامعة و المستندة لتاريخ أول دولة و أمة مركزية في التاريخ. ختامًا توقعوا الفترة الجاية تقارير كتير عن القومية المصرية كفكر صاعد علي الساحة بقوة غالبها تقارير سلبية منبثقة عن أفكار يسارية عن الفكر القومي المصري كونه عنصري - شوفيني - متطرف و غيرها من الاتهامات الحمضانة اللي اتهرست و اترد عليها مرارًا و تكرارًا.
Comments