مبدأياً قبل اي حاجة الكلام ده موجه لفئة معينه وهي للأسف من الاغلبية الا من رحم ربي.
ازاي تكون شيخ في مصر؟
اول حاجة ربي دقن طويلة كدا وحلوة حتى لو مش عارف هتربيها ليه بس اهو لوك وخلاص.
بعد كدا روح دور على كتاب معالم في الطريق للمقبور سيد قطب على كام كتاب لحسن البنا واسمعلك كام فيديو كدا لشيوخ الإرهاب اللي كلنا عارفينهم منهم القرضاوي والحويني ويعقوب وعبد الله رشدي.
خلاص انت كدا جاهز تكون "شيخ"، روح أي زاوية كدا واقعد زعق ف المايك واوعى تجيب سيرة الجنة والرحمة لا يقولوا عليك مسلم كيوت.
كام خطبة كدا عن النار وعذابها وعذاب القبر والثعبان الاقرع والموت وحاجات من دي واهم حاجة تكون بتزعق وانت بتتكلم.
متتكلمش عن حسن معاملة الجار ولا الرفق بالحيوان ولا الحفاظ على الممتلكات العامة ولا اي حاجة تفيد المجتمع لازم تخوف الناس انت عايز الناس تقول الاسلام دين وسطي ولا ايه!! تبقا مسلم كيوت.
طب لو حاسس انك زهقت من كلام العذاب والنار ده تعمل ايه؟
ببساطة روح طلع عين المرأة شوية يعني اقعد اهري شويتين ف موضوع الحجاب والنقاب وقول ان مينفعش المرأة تبين ايدها وان التحرش سببه لبس المرأة والمرأة خلقت لتخدم البيت والزوج وحاجات م اللي انتوا عارفينها دي.
تخيل يا مؤمن ناس ف 2022 بتفكر هل يجوز للمرأة السفر من غير محرم ولا لا!!.
المجتمع في خطر والله
مش علشان هما مش في السلطة يبقا كدا خلصنا منهم لا والله.
ده خطرهم كل يوم بيزيد اكتر طول ما اللي اسمه الحويني وعبد الله مجانص وامثالهم متسابين يفتوا بكل راحة وياكلوا عقول الناس.
تخيل ان فضيلة الامام احمد الطيب شيخ الازهر طلع يهنئ المسيحيين كفروه!!!!! وعملوا منشن لمجانص "اللي بيبرر التحرش ويكفر المسيحيين" علشان يتأكدوا من صحة كلام شيخ الأزهر؟!
والله الدولة لازم تفوق ليهم وللتيار السلفي اكتر من الإخوان لأن الاخوان بقوا كارت محروق بالنسبة للشعب ولو الدولة مفاقتش ليهم هتصحى على كارثة ومصيبة ولازم الشعب والمجتمع كمان يفوق ليهم وينقي الشيوخ اللي ياخد منهم الفتوى زي الشيخ أسامة الأزهري والشيخ رمضان عبد الرازق والشيوخ الجميلة دي.
Comments