معروف في السياسة ان اللي بيحارب إسرائيل كأنه بيحارب أمريكا. طيب مجاش في بالكوا سؤال: مين بيدعم الـ Afrocentrism؟ اللي بيدعم حركة الأفروسينريك هي حركة اكبر منها اسمها الWoke Movement.
يعني ايه Woke Movement؟
تعتبر woke movement هي حركة تهدف لنشر الوعي بقضايا الحرية والعدالة الاجتماعية خصوصاً العنصرية، والشخص اللي بينتمي للحركة دي يبقى اسمه Woke. العديد من انصار الحركة دي بيؤمنوا ان الرجل الأبيض لسة عنده ميزات كتيرة على باقي طوائف المجتمع وكمان بيطالبوا بتعويض الأفارقة في امريكا مادياً وثقافياً ومعنوياً عن معاناتهم في زمن العنصرية، زي كدة الفلوس اللي ألمانيا دفعتها لإسرائيل تعويضاً عن محرقة الهولوكوست. الWoke Movement بيدعموا حركات كتير اوي زي الجيل التالت من الحركة النسوية (Third Wave Feminism) و Black Live Matter ومنظمة الـ LGBTQ+ وغيرها من منظمات اليسار السياسي العالمية.
لو هما هدفهم تحقيق العدالة الاجتماعية وانهاء العنصرية، ايه المشكلة في كدة؟
المشكلة ان تصرفاتهم وتحركاتهم على ارض الواقع مش هدفها العدالة زي ما بيقولوا، الحركة دي عندها عداوة رهيبة مع مؤسسات الدولة خصوصاً الشُرطة، و بيرفعوا شِعار ACAB اختصار All Cops Are Bastards يعني كل رجال الشرطة أوباش. بردو عندهم تسامح رهيب مع المُجرمين لو كانوا من ذوي البشرة السوداء زي ايام مظاهرات Black Lives Matter في امريكا كانوا شايفين ان حرق المنشآت العامة وسرقة الأسواق ليها مبرر عشان "حسب كلامهم" العنف أحياناً هو الوسيلة الوحيدة لتحقيق اهدافهم. الكلام دة بالفعل موجود في كتاب The Communist Manifesto اللي ألِفه كارل ماركس مؤسس الشيوعية الحديثة. نفكركم ان Patrisse Cullors مؤسسة حركة Black Lives Matter قالت ان هي وباقي قادة الحركة توجهاتهم شيوعية ماركسية.
فوق كل دة حركة الـ Woke بتدعم التعددية الثقافية و دة يفسر ليه معظمهم بيدعموا السياسات اللي بتشجع على الهجرة بدلاً من زيادة عدد المواليد محلياً عشان بيحلموا ان المجتمعات يبقى فيها ثقافات وهويات كتير بدل ما يكون فيه ثقافة واحدة وهوية واحدة بينتمي ليها كل أفراد المجتمع بغض النظر عن العرق او الدين او اللون او التوجه السياسي. فوق كل دة بيعتبروا الزواج مش حاجة اساسية ابداً في الحياة بل بعضهم هَبِت منه على الاخر و بيقول لازم نلغي المؤسسة الاجتماعية اللي اسمها الزواج لأنها تهديد لحرية المرأة حسب كلامهم.
حركة الـ Woke بيكرهوا العادات والتقاليد كلها و بيدعوا للحرية الشخصية المُطلقة، دة غير عدائهم مع المؤسسات الدينية وتحقيرهم لكل الأفكار اليمينية بشكل عام.
دة غير ان القومية في نظرهم هي عنصرية وتطرف لازم يقضوا عليها عشان يحققوا العدالة الاجتماعية. في الفترة الأخيرة بالتزامن مع جائحة كورونا، بعض رموز الحركة طلبوا من السلطات الصحية في العالم، و خصوصاً امريكا، ان ذوي الأصول الأفريقية (African Americans) يبقى ليهم الأولوية في حملات التطعيم ضد الفيروس.
-طيب من الواضح ان الWoke Movement تبع اليسار المتطرف او بين التطرف و الإعتدال.
ايه علاقتهم بحركة Afrocentrism؟
المركزية الافريقية هدفها تعويض الأفارقة الامريكان بشكل خاص والافارقة في العالم بشكل عام عن الجرائم اللي ارتكبها الأمريكان والأوروبيين في حقهم، والتعويض مش شرط يكون مادي زي ما ألمانيا عملت مع اليهود. حركة الWoke Movement بيدعموا الصوابية السياسية واعادة مراجعة التاريخ “Historical Revisionism” عشان (حسب كلامهم) التاريخ اللي احنا عارفينه كله أكاذيب من تأليف الرجل الأبيض الاوروبي وخصوصاً تاريخ الشرق الأدنى يعني مصر القديمة واليونان القديمة وبني إسرائيل وبني اسماعيل (العرب) والحضارة البابلية و غيرها من حضارات الشرق القديم و معالجة العنصرية هي دراسة التاريخ من وجهة نظر الافارقة. الWoke و الAfrocentrism بيشتركوا في ايمانهم ان الرجل الأبيض ورث الخطيئة عن اجداده اللي استعبدوا الأفارقة والرجل الأبيض المعاصر لازم يدفع ثمن اللي اجداده عملوه.
في النهاية نقدر نقول ان الـ Woke Movement حركة يسارية بين اليسار المعتدل و اليسار المتطرف، و اكبر تأثير عليهم هو الشيوعية واليسار الحديث.
المقالة دي كان شرح للـ Woke Movement، ان شاء الله في المقالات الجاية هنتكلم عن الـ Afrocentrism بشكل خاص. هنتكلم عن اصلها، اهدافها، ابرز شخصياتها، حجم تأثيرهم وكل تفاصيل الحركة.
Comentários