كتابة: ميادة جميل
فترة عصيبة مرت على كافة المصريين الأسبوع ده وحوادث مأساوية من جرائم قتل وعنف ضد النساء وحوادث تطرف واعتداء واخرها تهكم وازدراء ضد أي انجاز مصري عظيم بريادة امرأة مصرية خلاف خطابات الكراهية المغلفة بالكوميديا واللي مالية السوشيال ميديا.
طب ايه دخل السلفيين في كل الحوادث دي ؟
الحقيقة كل ما يحدث في مصر من حوادث سلبية في الوقت الحالي ليه أسباب وجذور تاريخية مترابطة ومتشعبة وكان للسلفيين دور كبير فيها بصناعة كائن مصري رجعي متشدد خلال الاربعين سنة اللي فاتوا وخلق مناخ متطرف ضد تقبل الآخر وينبذ الحداثة والتطور باعتبراها خروج عن الدين والدين براء منهم !
بداية من فترة السبعينات وظهور الشيخ كشك وتسجيلاته اللي انتشرت في البلد كلها وبدأ السطو على ثقافة المجتمع المصري وغزو عقول المصريين بأفكار السلفية والوهابية والتشدد تحت مسمى "الصحوة" ولكنها في الواقع كانت "الغفلة" حتى انتشر التطرف والعنف اللفظي وخطابات الكراهية والتكفير ضد المصري المسلم المعتدل العادي والمسلمة غير المحجبة والمصري المسيحي وكل ما هو غير سلفي ! وانتشرت قنوات السلفيين وخرج علينا أمثال الحويني وحسان ويعقوب بتصوير المرأة بإنها عورة وأي انجاز ليها هو عبثي ومش مهم طالما خارج عن حيز البيت وتربية الأبناء وأي ست تفكر تخرج عن القالب ده تعتبر ضالة وناشز ويجب تقويمها عن طريق الرجل سواء بضربها او بحبسها او ايا كان طالما حسب اعتقادهم هي ناقصة عقل ودين ومش عارفة مصلحتها مهما كان سنها أو درجتها العلمية.
فمنستغربش لما نلاقي حوادث عنف وضرب وقتل ضد النساء باعتباره حق مشروع للرجل الوصي القائم المشبع بأفكار السلفية و تعاطف مع قاتل ضد ضحية لمجرد انها مش محجبة وكان ليها كيان وبتشتغل عشان احلامها !
وكان اخرها فعلا تصريحات المدعو مبروك عطية ع جريمة قتل طالبة المنصورة واللي ربط فيها القتل بالحجاب بتحريض وتبرير مباشر لقتل غير المحجبة ليشاء الله أن يحرجه بجريمة قتل مشابهة ضد فتاة محجبة بعد تصريحه بيوم واحد ده خلاف خلفية القاتل العنيفة ضد المرأة ب إنه كان بيضرب أمه واخواته البنات في إثبات حقيقي لأفكار السلفية المتطرفة والمحقرة للمرأة اللي مسيطرة عليه !
ولا فيه داعي للتعجب من السخرية والازدراء من الانجازات العظيمة اللي بيحققوها مصريات لمجرد انهم (بنات)!
بردو منستغربش التبريرات اللي بتطلع مع كل حادثة تحرش بجمل زي ( كانت لابسة ايه / ايه اللي طلعها من البيت / كانت بتضحك ليه / كانت بتشتغل ليه )
الكارثة !؟
الكارثة إن طلع عندنا أجيال من المصريين سلفيي الهوى لدرجة تلاقيهم سلفيين من غير ما يعرفوا وتلاقيهم بيرددوا أفكار السلفية وبيتبنوها ظنا منهم ان هي الدين أو صحيح الدين بسبب تسميم عقولهم واحتكار السلفيين للدين واختراقهم لأهم أساس في صناعة الوعي وهو قطاع التعليم حتى طلع عندنا بعض الأزاهرة اللي بيرددوا كلام السلفيين طمعا في القرب من التيار (الممول) ده !
طلع عندنا اجيال كارهة للمرأة وبتحقرها وبتنظر ليها كمجرد سلعة وفتنة يجب حجبها وإخفائها بكل السبل !
والكتير من كوارث الفكر السلفي المتجذرة في المجتمع بعد أكثر من أربعين سنة من سيطرة السلفيين ع وعي المصريين زي خلق نزعة طائفية وعنصرية في وعي المصري وتحقير الانتماء للوطن وتقديس البشر والتكفير وغيرها من الكوارث البعيدة عن الدين و اللي هيكون لينا وقفات معاها في بوستات قادمة
ختامًا
لحد ايمتى هيتم السكوت عن السلفيين واللي بيعملوا من تخريب في المجتمع وتغلغل في مؤسسات الدولة وركوبهم الترند إعلاميا مع كل قصة وحادثة في مصر لاستغلالها لصالحهم !؟
وفين دور الأزهر من انتشار الخطاب السلفي وسيطرته !؟
كتيار قومي نأسف لكل ما آل إليه مجتمعنا المصري نتيجة التغييب والإهمال ع مدى عشرات السنين ولا شك انه كان ضحية مؤامرة تمارس عليه بإسم الدين ولكن في نفس الوقت بنتمنى التدخل العاجل لتدارك الوضع وتغيير التردي الثقافي والاخلاقي اللي وصله المصريين قبل ما تزيد الأمور سوء.
留言