صراع الهويات

بيحصل دلوقتي صراع رهيب داخل فيه تيارين فكريين، الأول هو المصري والتاني العروبي.

طب ايه اللي دخلنا في القصص دي؟

من بعد ما حكم الفراعنة في مصر انتهى على أيد الفرس، لحد الرئيس محمد نجيب كل اللي حكموا مصر مش مصريين، يعني حوالي ٢٠٠٠ سنة، تاه الشعب فيهم وحصلت مجزرة الهوية المصرية، لحد ما الشعب المصري مبقاش عارف هو مين؟ والمفروض يتبع مين.

لكن أثناء الاحتلال الانجليزي على مصر كان في ناس وطنيين جدا وكان ليهم دور مهم واللي عملوه فرق في حياتنا لحد دلوقتي، زي طلعت حرب وسعد زغلول وأحمد لطفي السيد وغيرهم، الناس دول فكروا ازاي نقدر نقاوم فكرة الاحتلال، لأن كان في ناس كتير للأسف مش فارق معاهم ان الانجليز محتلينا، وشايفين ان طالما المصلحة دايرة مش مهم مين عالكرسي، مع كل العنصرية والظلم اللي كان بيتعامل بيه المصري في الوقت ده، لقى الوطنيين حل عشان يقنعوا الناس بمقاومة الاحتلال، وهو اننا نسترجع هويتنا المصرية، اللي هتخلينا مستقلين بنفسنا ومش مضطرين نكون تابعين لحد.

والفكرة نجحت فعلا والفكر القومي المصري والوعي الثقافي زاد جدا عند المصريين، وفضلت الهوية المصرية مسيطرة لحد ما جي عبد الناصر اللي غلط غلطة مكانش واخد باله من أضرارها ساعتها، وهي فرض القومية العروبية على مصر، والموضوع كان صعب جدا في البداية، لدرجة ان الحصري اللي ناصر جابه عشان يروج للفكر العروبي فقد الأكل في الأول وقال ان المصريين مستحيل يعتنقوا اي حاجة غير الهوية المصرية اللي مسببالهم فخر واحترام الذات.

لكن للأسف مع الضغط المستحيل اتحقق، وفقد أغلب الشعب هويته، وقدر دعاة الهوية العروبية يلزقوا فكرتهم في الدين، مع ان مفيش أي تعارض بين أي دين وأي قومية، ولا القومية تفرق في دخول الشخص الجنة أو النار، يعني لو قلنا ان واحد صيني مؤمن نقي وواحد عربي عاصي، يبقى فرصة العربي أفضل من الصيني في دخول الجنة لمجرد انه عربي؟ طبعا لا.

ده حتى الاتراك اللي شغلوا أبواق اعلامية ضخمة خلال الفترة الأخيرة عشان يحصدوا انتماء متحدثي العربية، هم نفسهم قوميين لبلدهم وبيتكلموا لغة غير العربي وبيفتخروا بجنسهم وتاريخهم، يبقى انت كواحد مصري أيه حجتك انك تتنصل من هويتك وحضارتك وتحاول تتلزق في أي حد؟ وايه حجتك في التهم الرهيبة اللي بترميها على المصريين القدماء؟

اعتناق الهوية المصرية شرف وفخر وبدونه ينهار الوطن، وهدفنا اننا نعرف كل الناس بهويتنا وتاريخنا وأصلنا.