ليه سد النهضة باقي لحد دلوقتي؟

مقدمة:

احنا عارفين اد ايه ملف سد النهضة مهم لينا كلنا و اد ايه الاحباط الي متملك كل حد فينا بسببه لان كل واحد كان متخيل ان الحوار كان مجرد كذا سرب من المقاتلات المصرية تدمر السد وترجع و خلصت بس دي ديما مشكلتنا ديما (الرؤية الكاملة مش عندنا) والرؤية الكاملة دي تشمل تحركات ما قبل الفعل و بعده الي فكرنا فيه هو ضرب السد طيب و نتائج ما بعد العمل؟ يعني الخطوات و النتائج المترتبة الي هتحصل ما بعد الضربة لا يعم فكك المهم يضربوه.

عجز القدرة العسكرية المصرية في بدايه الازمة:

خلينا بس نقول ان سلاح الطيران المصري قبل ثورة يناير كان بدون اي مخالب ، حرفيا الولايات المتحدة و إسرائيل كانت ناجحة في الضغط علينا لتكوين سلاح جوي محدود القدرات من حيث المدي العملياتي و الذخيرة ف المفجاءة انك لحد 2015 تقريبا مكنتش فيه مقاتلات لعمق إثيوبيا بشكل مباشر وتضرب وترجع مكنتش عندك طائرات تانكرز لتزويد الوقود في الجو.

🔹 كنت اعمي في الفضاء لأنك مكنش عندك اي قمر صناعي للتجسس و الاستشعار ف ازاي عايز تعمل عمليه زي دي بدون طائرات تانكرز لتزويد المقاتلات بالوقود في الجو و قمر صناعي يكون هو عينك في السماء لرسم و تحليل كل شي بدقه.

علاقتنا السيئة ب المحيط الافريقي:

🔸من الكوارث الي ورثها النظام الحالي من نظام حسني مبارك السوء الشديد بعلاقتنا بالدول المحيطة بينا في القارة ف ضيف علي كل ده علاقتنا شديدة السوء بالدول الأفريقية الي حتي لو كانت حصلت المعجزة وضربنا السد كانت هتبقي مقاطعه كامله لينا منهم لكن دلوقتي عندنا علاقات ممتازة مع كبار القاره زي جنوب أفريقيا، نيجيريا، النيجر ، كينيا، اوغاندا ، الكونغو، تنزانيا، الصومال بنظمها الجديد، جنوب السودان حتي لو عندها علاقات مع إثيوبيا بس بردو تربطها مصالح كبيره اوي مع مصر نفس الكلام مع جيبوتي

🔹 التوسع الشديد و الملحوظ في علاقاتك بدول غرب أفريقيا السنغال و غانا و ساحل العاج و الكاميرون و غيرهم يعني في خلال ١٠ سنين نجحت في خلق تحالفات من دول و تعميق علاقات مع دول تانية من أفريقيا.

اصلاح العلاقة بالتنمية في افريقيا:

ف ضمنت بالدعم التنموي الاقتصادي و العسكري عن طريق جناحي مصر في أفريقيا العملاقين المقاولون العرب و السويدي اليكتريك في انشاء تنميه في الدول دي من سدود و محطات كهرباء و بنيه تحتيه و غيرها وتدريب بعض جيوش الدول دي في مصر و دعمها بالسلاح فلو حصل حاجه ضد السد علي الاقل الدول دي تكون علي حياد لو حتي مش هتدعم الخطوه كل ده يا جماعه بياخد الوقت و مجهود و مفاوضات العملية مش لعبه Call of duty كل ده عايز صبر و تدريب علي المقاتلات و دمج الاقمار الصناعية في المنظومة و بناء علاقتك كامله تاني مع أفريقيا من الصفر.

🔹 ده غير ان كان لازم إثيوبيا تغلط بمعني اني اي احد بيسخر من اتفاقية المبادئ دي يا خاين يا ساذج ولما الاخوان كانوا بيعيطوا عشان نخرج منها فكان لازم تعرف ان ده معناه انك بتقضي علي الورقة الوحيدة الرسمية الي مضت عليها اثيوبيا و انتهكت مبادئها ..لان الغرض من الاتفاقية دي انها تكون مبرر لو مصر تحركت علي الارض ضد إثيوبيا لان سيبك من اي حاجه مكتوبه فيها و ركز علي اهم بند فيها الي هو عدم شروع اي دوله علي إجراءات احاديه بدون الرجوع للأطراف الأخرى "مش مجرد أخبارهم " لا الغرض التنسيق و ده الي إثيوبيا انتهكته عدة مرات يبقي انت ازاي بتهاجم اتفاقيه بتنظم اداره امر واقع اتبني خلاص بقاله ٤ سنين!

🔸 ف لو اتحركت تعرف تبرر تحركك بمعني إثيوبيا نجحت في التخطيط الفعلي للسد والاتفاق مع الشركات من اواخر ٢٠٠٩ و بدايات ٢٠١٠ و نجحت في البنا الفعلي من مارس ٢٠١١ فالسد كده كده كان امر واقع خلصت قدر اتبني واي تحرك ضده في الوقت ده للاسف كان غير ممكن من ضغف الدولة سياسيا و الاوضاع الداخلية المضطربة مكنش فيه دوله اصلا غير جزئيه التسليح و رد فعل الدولة الأفريقية لو حاجه حصلت.

اتفاقية المبادئ 2015:

دي الاتفاقية كاملة سيبك من اي بند وشوف البند رقم 5 بذات اقرائها 200 مرة مش هتطلع بنتيجة غير ان اثيوبيا مينفعش تاخد قرار يأذي الدول التانية و ما ينفعش تملي الملئ الاول و تدير السد بدون التنسيق مع الدول التانية و التنسيق ده يشمل التفاهم و الاتفاق شوف بقي اثيوبيا انتهكت المبادئ دي كام مرة يبقي علي اي اساس عايز تنسحب منها و في نفس الوقت تضرب السد!

السد كان امر واقع من 2011 و 2012 كان خلاص بقي ليه كتلة و جسم ودخل في بناءه الصين و ايطاليا.

فالخلاصه ان مصر مش دولة مراهقة سياسيا هي كانت عارفه وبنسبة كبيرة ان اثيوبيا هتلاوع و مش هتلتزم فكان لازم لو هتتحرك عسكري لو حتي بعد 10 سنين يكون فيه مبرر لده و مفيش مبرر بدون انتهاك الاتفاقية

بنود الاتفاقية:

1- مبدأ التعاون: - التعاون علي أساس التفاهم المشترك، المنفعة المشتركة، حسن النوايا، المكاسب للجميع، ومبادئ القانون الدولي. - التعاون في تفهم الاحتياجات المائية لدول المنبع والمصب بمختلف مناحيها.

2- مبدأ التنمية، التكامل الإقليمي والاستدامة: - الغرض من سد النهضة هو توليد الطاقة، المساهمة في التنمية الاقتصادية، الترويج للتعاون عبر الحدود والتكامل الإقليمي من خلال توليد طاقة نظيفة ومستدامة يعتمد عليها.

3- مبدأ عدم التسبب في ضرر ذى شأن: - سوف تتخذ الدول الثلاث كافة الإجراءات المناسبة لتجنب التسبب في ضرر ذى شأن خلال استخدامها للنيل الأزرق/ النهر الرئيسي. - على الرغم من ذلك، ففي حالة حدوث ضرر ذى شأن لإحدي الدول، فان الدولة المتسببة في إحداث هذا الضرر عليها، في غياب اتفاق حول هذا الفعل، اتخاذ كافة الإجراءات المناسبة بالتنسيق مع الدولة المتضررة لتخفيف أو منع هذا الضرر، ومناقشة مسألة التعويض كلما كان ذلك مناسباً.

4- مبدأ الاستخدام المنصف والمناسب: - سوف تستخدم الدول الثلاث مواردها المائية المشتركة في أقاليمها بأسلوب منصف ومناسب. - لضمان استخدامهم المنصف والمناسب، سوف تأخذ الدول الثلاث في الاعتبار كافة العناصر الاسترشادية ذات الصلة الواردة أدناه، وليس على سبيل الحصر:

أ- العناصر الجغرافية، والجغرافية المائية، والمائية، والمناخية، والبيئية وباقى العناصر ذات الصفة الطبيعية؛

ب- الاحتياجات الاجتماعية والاقتصادية لدول الحوض المعنية؛

جـ- السكان الذين يعتمدون علي الموارد المائية في كل دولة من دول الحوض؛

د- تأثيرات استخدام أو استخدامات الموارد المائية في إحدى دول الحوض على دول الحوض الأخرى؛

هـ- الاستخدامات الحالية والمحتملة للموارد المائية؛

و- عوامل الحفاظ والحماية والتنمية واقتصاديات استخدام الموارد المائية، وتكلفة الإجراءات المتخذة في هذا الشأن؛

ز- مدي توفر البدائل، ذات القيمة المقارنة، لاستخدام مخطط أو محدد؛ حـ- مدى مساهمة كل دولة من دول الحوض في نظام نهر النيل؛

طـ- امتداد ونسبة مساحة الحوض داخل إقليم كل دولة من دول الحوض.

5- مبدأ التعاون في الملء الأول وإدارة السد: - تنفيذ توصيات لجنة الخبراء الدولية، واحترام المخرجات النهائية للتقرير الختامي للجنة الثلاثية للخبراء حول الدراسات الموصي بها في التقرير النهائي للجنة الخبراء الدولية خلال المراحل المختلفة للمشروع. - تستخدم الدول الثلاث، بروح التعاون، المخرجات النهائية للدراسات المشتركة الموصي بها في تقرير لجنة الخبراء الدولية والمتفق عليها من جانب اللجنة الثلاثية للخبراء، بغرض:

• الاتفاق على الخطوط الإرشادية وقواعد الملء الأول لسد النهضة والتي ستشمل كافة السيناريوهات المختلفة، بالتوازي مع عملية بناء السد.

• الاتفاق على الخطوط الإرشادية وقواعد التشغيل السنوي لسد النهضة، والتي يجوز لمالك السد ضبطها من وقت لآخر.

• إخطار دولتي المصب بأية ظروف غير منظورة أو طارئة تستدعي إعادة الضبط لعملية تشغيل السد. - لضمان استمرارية التعاون والتنسيق حول تشغيل سد النهضة مع خزانات دولتي المصب، سوف تنشئ الدول الثلاث، من خلال الوزارات المعنية بالمياه، آلية تنسيقية مناسبة فيما بينهم. - الإطار الزمني لتنفيذ العملية المشار إليها أعلاه سوف يستغرق خمسة عشر شهراً منذ بداية إعداد الدراستين الموصي بهما من جانب لجنة الخبراء الدولية.

6- مبدأ بناء الثقة: - سيتم إعطاء دول المصب الأولوية في شراء الطاقة المولدة من سد النهضة.

7- مبدأ تبادل المعلومات والبيانات: - سوف توفر كل من مصر وإثيوبيا والسودان البيانات والمعلومات اللازمة لإجراء الدراسات المشتركة للجنة الخبراء الوطنين، وذلك بروح حسن النية وفي التوقيت الملائم.

8- مبدأ أمان السد: - تقدر الدول الثلاث الجهود التي بذلتها أثيوبيا حتى الآن لتنفيذ توصيات لجنة الخبراء الدولية المتعلقة بأمان السد. - سوف تستكمل أثيوبيا، بحسن نية، التنفيذ الكامل للتوصيات الخاصة بأمان السد الواردة في تقرير لجنة الخبراء الدولية.

9- مبدأ السيادة ووحدة إقليم الدولة: - سوف تتعاون الدول الثلاث على أساس السيادة المتساوية، وحدة إقليم الدولة، المنفعة المشتركة وحسن النوايا، بهدف تحقيق الاستخدام الأمثل والحماية المناسبة للنهر.

10- مبدأ التسوية السلمية للمنازعات: - تقوم الدول الثلاث بتسوية منازعاتهم الناشئة عن تفسير أو تطبيق هذا الاتفاق بالتوافق من خلال المشاورات أو التفاوض وفقاً لمبدأ حسن النوايا. إذا لم تنجح الأطراف في حل الخلاف من خلال المشاورات أو المفاوضات، فيمكن لهم مجتمعين طلب التوفيق، الوساطة أو إحالة الأمر لعناية رؤساء الدول/رئيس الحكومة. وقع هذا الاتفاق حول إعلان المبادئ في الخرطوم، السودان في 23 من شهر مارس 2015 بين جمهورية مصر العربية، جمهورية إثيوبيا الفدرالية الديمقراطية وجمهورية السودان.

وضع مصر السياسي الصعب:

ده غير ان حضرتك ناسي حاجه في منتهي الاهمية من حماسك لضرب السد بس حضرتك ناسي وضع مصر السياسي و الدبلوماسي لاعوام 2013 2014 2015 شديد التعقيد بعد احداث يونيو 2013 و رابعه العالم كله حرفيا قاطعنا علاقات في منتهي السوء مع نظام اوباما الاتحاد الاوروبي مقطعك وبرلمانات العالم بتصدر ضدك مشاريع عقوبات الاتحاد الافريقي جمد عضويتك فتقوم في عز كل ده تعمل عمل عسكري عدائي ضد هدف مدني في دولة وتستغل قوتك العسكرية ده لو واحد فاتح محل بقاله و مسكوه البلد مش هيضرب السد يجماعه.

🔹ضيف علي كل ده انك كنت مستحيل تفتح لنفسك جبهه حرب جديده ضد عدو علي بعد ٣٠٠٠ كم و انت عندك حرب داخليه في مساحه قدرها ٦٠ الف كيلو متر مربع ازاي اصلا تعلن حرب علي دوله و انت نفسك داخل حدودك في حرب ضد كوكتيل تنظيمات و مشاكل في البحر المتوسط مع البحرية التركية و حرب كانت في ليبيا و بلسان الرئيس المصري القوات الخاصة المصرية كانت بتضطر تتوغل داخل ليبيا لشن العمليات العسكرية كل جبهه من دول تهد دوله ده غير عقوبات امريكا علي السلاح الي كان معظمه امريكي حوار الاباتشي و F16

الاسباب الرئيسة لعدم الهجوم علي السد بعد تحسن القدرة السياسية و العسكرية لمصر:

🔸 صحيح دلوقتي و بعد ١٠ سنين اختلف الامر عندنا أقمار صناعية سلاح جو قوي جدا و متنوع وقادر للوصول لاعماق محترمة و الحرب في سيناء بفضل الله خلصت فيتبقي السؤال الاهم.. امال معملناش عمل عسكري ضده ليه؟.. الاجابة ببساطه القيادة السياسية بتتجنب الحرب بأقصي قدر ممكن القياده كان في اعتقادها ان المفاوضات و الضغوطات علي إثيوبيا سواء من ترامب علي سبيل المثال او من خلال اشعال اوضاع داخليه في إثيوبيا عن طريق المعارض جوهر محمد و غيره كان ممكن يؤدي الي ان إثيوبيا تمضي علي اتفاق و عشان دي قياده سياسية لدوله وليها اجهزه امنيه و عسكرية مش مجرد اداره سوبر ماركت اولاد سعيد كانت طبعا متوقعه بنسبه ما تعنت إثيوبيا خاصه مع دعم إسرائيل ليها و اغراق السد ب استثمارات خليجية و صينية و اوروبيه و للعلم شركه بناء السد ايطاليه اصلا فكانت ماشيه في الحل الدبلوماسي و المفاوضات و في خط موازاي التحضير لاي حل عسكري لو اضطرينا لده.

مكالمة ترامب:

ترامب كان ليه مكالمه هاتفيه مع عبد الله حمدوك سنة 2020 رئيس وزراء السودان و خلال المكالمة قال "ان الوضع خطير للغاية لأن مصر لن تكون قادرة على العيش بهذه الطريقة. وسينتهي بهم الأمر بتفجير السد"، مضيفا "وقد قلتها، وأقولها مجددا وبصوت عال وواضح، سوف يفجرون ذلك السد. عليهم أن يفعلوا شيئا ما".

طبعا ده كلام طالع من رئيس اكبر دولة في العالم يعني عارف كويس بيقول ايه و المصريين لما بيقعدوا معاه او مع ممثل امريكي بيتم التلويح بضرب السد ده مش تصريح مضروب في برنامج معتز مطر ولا احمد موسي ده تصريح صوت و صوره لرئيس اكبر دولة في العالم

القصف المباشر مش شرط هو الحل العسكري الوحيد وايه السينايوهات المتوقعه:

طبعا السد فضل يتملئ علي مدار السنين و اصبحت مهمه قصفه بشكل مباشر مستحيلة لانه اصبح عبار عن قنبلة مائية هتمحي السودان و الرئيس المصري ظهر في كذا لقاء قبل كده و لوح للحل العسكري بطريقه غير مباشره لو حصل ضرر لمصر .. طب و هل علي مدار ١٠ سنين دول محصلش ضرر ؟ طبعا حصل بس مصر عرفت تستوعبه من خلال مخزون بحيره السد و إنشاء محطات تحليه المياه و محطات التنقية الثلاثية عشان تستفيد بالمياه كذا مره للزراعه و من حظنا الحلو ان السنين الي فاتت الفيضان كان بيجي قوي جدا و ما تعرضناش لاي سنين جفاف و علي فكره كل ده متحط في ملف تحت بند ضرر السد لمصر الي مصر هتقدمه للعالم كله لو حصل اي تحرك و الله انا اتحركت ضد السد عشان كذا و كذا و كذا ده غير الحرمان من زراعه الرز و ازاله مساحات شاسعه من الاشجار في المدن الي بتستهلك مايه كتير كل ده بيدل ان الدوله دي فعلا تضررت بشده من السد ده وان اي تحرك ضده ده حق مشروع للدفاع عن الامن القومي المصري

🔹 ف حتي مع جاهزية الجيش ..الحرب مش سهله طيب السد حصل ضده تحرك عسكري ( الي هو بالمناسبة مش شرط ابدا يكون قصفه بالطيران التحرك ممكن هيكون احتلال منطقة السد لاجبار إثيوبيا للتفاول و الخروج ب اتفاق قانوني ملزم بس ساعتها هيكون بشروطنا احنا خاصه ان السد ٤٠ كم من حدود السودان فيحصل احتلال لمنطقه السد و طلب فوري للتفاوض و مصر عندها علاقات كبيره اوي مع سكان اقليم بني شنقول الي هما اصلا عايزين ينفصلوا عن إثيوبيا كده كده مش كل حاجه لازم تتقال في الاعلام ) ده غير العلاقات مع جبهه تحرير التيجراي ف مش هتخش لوحدك لو حصل توغل شبيه لده طيب استمر التعنت و عدم الجلوس للمفاوضات عادي جدا تفريغ السد بطريقة هندسية معينه من قبل القوات المسلحه و تفجير و تخريب السد و من ثم الانسحاب ..قيام حرب انفصاليه في اقليم بني شنقول جنب السد زي الي قامت كذا مره قبل كده بس علي خفيف فمصر تعرب عن قلقها و ان ده في خطر علي امنها القومي ان ممكن يحصل اضرار شديده للسد فتطلب الوصايه علي السد او تدخل هي عسكريا في ارض السد ف الي حابس نفسه في سجن قامت قواتنا الجوية ده يهدأ بس في حلول كتير في قاموس العسكرية المصرية .

الحرب كلمة سهلة بتتقال لكن تكالفها غاليه و مريرة :

🔸فكرت مره لو بدأت حرب معاهم وانت في وضع غير مناسب او حتي مناسب والله الامم المتحده بقيادة الولايات المتحدة هتعمل فيك ايه طيب المجري الملاحي لقناه السويس و السفن الي بتعدي من و الي البحر الاحمر مفكرتش ان إثيوبيا ممكن تحول البحر الاحمر ده الي حرفيا تجماعات من القراصنه تتحرش و تهاجم السفن الي بتعدي و راحه او راجعه من القناة للاسف مكنش عندنا لحد وقت قريب قوات بحرية و سلاح غواصات يأمن مساحات شاسعه من البحار لان امن قناة السويس بيبدأ من مضيق جبل طارق لحد مضيق باب المندب و غيرها من الاجراءات العدائيه الي كانت إثيوبيا ممكن تعملها بمساعده كيانات طبعا زي إسرائيل داخل مصر خطف سياح عمليات فدائيه توقع اي حاجه الامن في الدوله كان كارثه تحالف مع حوثيين الناحيه المقابلة و امدادهم بالسلاح لضرب ملاحة قناة السويس.

الخلاصه:

🔹العميد ياسر وهبه قال في الفيديو ده من ٤ سنين تقريبا في تهديد مبطن ل إثيوبيا لو مصر تحركت ضد السد علي الارض ايه الشكل الي ممكن تسلكه هو احتلال السد عسكريا اجبار إثيوبيا للتفاوض بشروطنا اخيرا الحل العسكري هو اخر حل للقياده السياسية و بتحاول تتفاده لحد دلوقتي لانهم عرفين كويس اوي معني انك تحارب علي بعد ٣٠٠٠ كم من ارضك بس اظن ان استبعاد الحل ده مش هيستمر كتير خاصا ان إثيوبيا مش عايزه توقع علي اي اتفاقية الحروب مش سهله يشباب العسكريين يعرفوا اكتر مننا ف ده عنا كمدنيين ده مش مبرر للتخاذل عن الدفاع عن الامن القومي بس لازم لما نتحرك نتحرك في توقيت صحيح عشان نتفادي اي كوارث و هما الي يفهموا في ده مش احنا و احنا لاحظنا تصريحات سامح شكري وزير الخارجية الي لاول مره بيتم التلميح فيها للقوة العسكرية حسم الملف قرب جدا وده هو الاكيد.