حابين نتكلم في موضوع مهم وجايز كلامنا ميعجبش جزء كبير من القوميين لكن احنا عايزين نحكم صوت العقل في الموضوع ده.
الموضوع اللي هو مصر والسعودية والسلفية والحداثة وعلاقة كل ده ببعض وهل فعلا السعودية متقدمة عننا في الموضوع ده وهل احنا مجتمع سلفي بالكامل والسعودية العكس؟ الإجابة في مقالة دي بشكل عاقل.
أولا لازم نقول هل السعودية فعلا ماشية في اتجاه الحداثة والتخلي عن السلفية؟
الإجابة اه اكيد السعودية ماشية في الموضوع ده وبتاخد خطوات كبيرة فيه، لكن مش بالطريقة اللي بتتسوق لينا ولو حد من اللي بيقرا البوست ده عايش ف السعودية أو يعرف حد عايش هناك اكيد عارف الكلام ده مقصود بيه ايه.
سعوديين كتير بيقولوا أن الواقع هناك غير التسويق خالص وان في أماكن في السعودية الناس هناك رافضة الخطوات اللي بتاخد تماماً ومنها القصيم وسكاكا وحفر الباطن، لكن الصورة اللي بتتنقل بتتنقل من منظور واحد وهو منظور الدولة السعودية عايزة توصله للناس حتى لو كان في عكسه.
بالنسبة بقا للمصريين اللي بيقولوا أن السعودية ماشيين في طريق ياريتنا احنا كمان نمشي فيه، تعالى هنا اقولك حاجة م احنا مصريين زي بعض عادي.
هل ف مصر ممنوع سواقة الستات؟ ممنوع الستات تتصور صورة البطاقة من غير حجاب؟ أو ممنوع تمشي ف الشارع من غير حجاب؟ مفيش اماكن ترفيه وسينيمات ومسارح وحفلات موسيقية والكلام ده كله؟
الإجابة طبعا في وكل الحاجات اللي السعودية بتاخد خطوات فيها علشان تغيرها هي حقوق دستورية وقانونية للمصريين عادي هنغير فيها ايه طالما هي موجودة اصلا؟
صحيح الفكر السلفي منتشر في مصر نتاج سنين طويلة من بث السموم في القنوات التلفزيونية السلفية وإهمال الرقابة على المساجد والزاوايا والمدارس لكن اي حد عايز يعمل حاجة مش عاجبة السلفيين بيعملها عادي وبحماية من الدولة كمان طالما في إطار قانوني.
أما بخصوص الفن والثقافة ف طبعا رغم اللي السعودية بتعمله لكن الفن المصري مازال هو الفن الأول في الشرق الأوسط كله، والفنان المصري ليه ثقل اكبر من اي فنان من اي دولة تانية
هتلاقي الاغاني المصرية سواء راب أو مهرجانات أو عمرو دياب أو هاني شاكر أو غيرهم في الافراح الخليجية أو في التجمعات العائلية أو تجمعات الاصحاب هناك. وبرضه هتلاقي الفنان المصري مطلوب في العالم كله اكتر من الفنان الخليجي وعلى سبيل المثال الفنان حمزة نمرة كان في رحلة موسيقية عالمية من حوالي شهر وفي الحفلات اللي بتتعمل في الرياض نفسها بتلاقيهم جايبين عمرو دياب أو تامر حسني أو حماقي علشان ليهم ثقل وبتكون حفلاتهم هي صاحبة أكبر نسبة حضور الجماهير.
ياريت نبص للحاجة بمنظور أوسع شويتين ونقدر ونعرف اننا كمصريين وكمصر قيمتنا كبيرة وصوتنا مسموع.
Comentários