مع بداية حملة #وقف_مسلسل_من_شارع_الهرم_الى المسلسل اللي بيعرض صورة منحطة عن المرأة المصرية في نموذج واحدة بتجري ورا الفلوس و بتدمر العائلات الكويتية و قمة قلة الأدب..الحملة قدرت توصل للصحافة المصرية و العربية من تاني يوم ليها مباشرة و تجمع اكتر من ٥٠٠ توقيع في مدة بسيطة و الناس بدأت تتناقش عن صورة المرأة المصرية.. ظهر علينا في نص الحملة ""بعض"" الكويتيين المدافعين عن المسلسل عشان يزودوا الطين بلّة بتأكيدهم علي الإهانة المباشرة لصورة المصرية بل من مبرراتهم و حججهم يدل عن كراهية و بغض شديد للمصريين عمومًا..
طب ما انتوا مسلسلاتكم كلها رقاصات؟ شمعنا احنا اللي اتحمقتوا من المسلسل اللي طلعنا فيها المصرية رقاصة.
ياريت الساذج اللي طرح الطرح ده ما اتكلم اصلًا كان أكرمله! أولًا فكرة إن كل المسلسلات و الافلام المصرية كده ده مش حقيقي إطلاقًا في مسلسلات و أفلام مصرية عظيمة عن كفاح الست المصرية..كون طارح الحجة مشافش الا أفلام السبكي و غيرها ده شيء تاني. ثم مين قال إن الأفلام دي مقبولة من الأساس؟ هل عدد المشاهدات في مصر أو الخليج مؤشر عن قبول النموذج ده من عدمه؟ سذاجة ما بعدها سذاجة. عرض نموذج الراقصة المنحلّة أخلاقيًا علي إنه ممثل للمرأة المصرية في المجتمع المصري والتلقيح علي المجتمع المصري كونه لا يعرف أخلاق ولا تديّن شيء هزلي الحقيقة.
من بعض ما عندك يا مصريين!! ما صورة الخليجي الشهواني السطحي الساذج بتملى افلامكم و مسلسلاتكم!
تبرير الخطأ بالخطأ نبذة عن عقلية طلرح الحجة..فمين قال/برر إن إهانة أي شخص سواء عربي أو غير عربي بتمثيله بدور بشكل غير لائق و مهين و منحط أمر مقبول؟ شتان الفرق بين ده و بين الإطار الكوميدي الهزلي الساخر و نموذج عرض صورة ذهنية تنطبع عند شعوب كاملة عن إن كتير من المصريات بهذا النمط! فلا والله ما هنقبل ده حتى لو المسلسل استمر في العرض! عشان اللي داخلين يزايدوا بإن المسلسل مش هيقف عرضه في مصر!
طب هو المسلسل غلط في ايه ما ستاتكم فعلا رقاصات و مشهورين بالرقص و الكباريهات مليانة مناطق القاهرة و الجيزة؟
شيء مضحك و محزن في نفس الوقت إن إنطباع طارح المنطق السخيف ده زاوية رؤيته كده عن المجتمع المصري و هي مبتعبرش الا عن اهتماماته في المقام الأول وحقده في المقام التاني. مصر يا عزيزي دولة كبيرة في المقام و التعداد..مصر زيها زي أي دولة هتلاقي فيها نماذج سيئة اختذلت فلكلور الرقص المصري علي إنه بديل عن النادي اليلي و التعرّي و اسائت و شوهت تراث مفترض إنه موازي لكتير من الرقصات الشعبية في دول كتيرة منها العرب نفسهم. مصر ستاتها و أمهاتنا و إختواتنا و بناتنا عبر التاريخ مناضلات أشرف من إن أي حد يطلعهم بصورة سافلة و منحطة..بس الكويس لإن الحملة دي تسجيل مواقف. ختامًا لازم نشهد إن كويتيين محترمين كتير شاركوا معانا علي الهاشتاج و عبروا عن أسفهم و حزنهم الشديد للحاصل تجاهنا و إن كلام الناس دي لا يعبر إلا عن شخصهم و كذا المسلسل لا يعبر إلا عند منتجه و مخرجه و إنهم يكنوا كل الإحترام و التقدير للمصريات و المصريين في العموم.. و إحنا فاهمين إن النماذج السيئة موجودة في كل الأطراف و عشان كده بنتكلم.. متنسوش توقعوا علي الحملة و تشاركوا علي الهاشتاجات من هنا
Comentários