الهشتاج ده بقاله فترة متصدر التريند علي جميع مواقع التواصل الإجتماعي في مصر.
نبذة عن المشكلة
المشكلة مش بس في إن الإنترنت في مصر محدود
بالرغم من إن المشكلة دي لوحدها كفاية الا أنه بجانب ده فإن الإنترنت في مصر بطئ مقارنة بالمتوسط العالمي بالإضافة إلي سوء خدمة العملاء مشكلة بيشتكي منها عدد كبير جداً من الناس.
سياسة الإستخدام العادل
بترجع المشكلة ل 2018 لما تم تطبيق نظام (الإستخدام العادل) والي اتقال وقتها ان ده بسبب الإستخدام السئ للمشتركين وإن ممكن عدد كبير جداً يشترك علي روتر واحد فتم إلغاء الإنترنت الغير محدود وإستبدالة بباقات محدودة بسرعة أفضل نسبياً.
بس ده مكنش عادل بالنسبة للمستخدمين فبعدها بسنة علي طول 2019 خرج هاشتاج بيطالب بإنترنت غير محدود إلا إن مطالب الناس وقتها تم تجاهلها وقيل إن البنية التحتية في مصر مش هتستحمل ده.
هل الانترنت سلعة ترفيهية ؟
الحقيقة الإنترنت دلوقتي مبقاش سلعة ترفيهية بالعكس ده بقا شئ ضروري من غيره هيحصل شلل تام في كل مرافق الدولة وفي ناس مصدر دخلها الوحيد بيعتمد علي الإنترنت.
ده غير طلبة المدارس والجامعات الي إمتحاناتهم ومحاضراتهم علي شبكة الإنترنت وجعل الإنترنت في مصر محدود وتقييد إستخدامة بالشكل ده بيُبطئ عملية التحول الرقمي الي مصر بتسعالة بشكل غير مباشر.
في دول عندها مشاكل إقتصادية عملاقة ومع ذلك عندها إنترنت غير محدود
دول زي العراق ولبنان بتعاني من مشاكل كتير جدا وحروب وصراعات لا حصر لها مما يعني إن البنية التحتية هناك مش موجودة ومع ذلك عندها إنترنت غير محدود علامات إستفهام كتيرة
بالإضافة إن مصر بقالها ٤ سنين كاملة بالوضع ده والمفروض إن الوضع ده يبقي مؤقت ومع ذلك مشوفناش أي تقدم أو تحسن في الملف ده 4 سنين = 0 تطور
أيه المطلوب ؟
المطلوب إن المسؤولين ميتجاهلوش مطالب الناس ويسعوا لإرضائهم بأي شكل من الأشكال لأن ده بيولد غضب من الشباب تجاه الحكومة بلا أي داعي خصوصاً إن الناس شايفة انها بيتم إستغلالها عمداً لتحقيق مكاسب مادية علي حسابهم
المطلوب إن يتم عمل باقات إنترنت غير محدودة خصوصاً إن البنية التحتية دلوقتي أفضل عشرات المرات من البنية التحتية من 4 سنين.
لو ده محصلش فعلي الأقل يتم زيادة سعة الباقات مقابل نفس السعر ومراعاه دخل المواطن خصوصاً زي موضحنا إن الإنترنت مبقاش سلعة ترفيهية
نتمني نشوف تحرك المرادي من المعنيين بالأمر والإستجابة لمطالب الناس في أسرع وقت وعدم تجاهل الموضوع لأن هيسبب حالة من الأستياء ملهاش داعي
Comments