هل القومية المصرية تسيئ الي الاديان السماوية؟

مقدمة:

موضوع حابين نتكلم فيه لانه ما ينفعش يتسكت عليه أكتر من كده للاسف القومية المصرية بتواجه حرب شرسه و الحرب دي يمكن هتقولوا من الاخوان و السلفيين او اليسار.

فهنرد نقول طبعا دول جزء كبير من الي بيحربونا لكن للاسف الشديد الواضح دلوقتي اتضح ان في ناس محسوبه علي القوميين هما نفسهم خطر علي القوميه اكتر من الاطراف الي ذكرناها دول.

بدون اي تجريح او تشخيص احنا فعلا مش فاهمين ايه غرضهم من قتل التيار الي تم بعثه للحياه مره تانيه في فتره مهمه و شديده الحساسيه زي دي و هي فتره عودة انتشار الفكر.

ضرورة احترام عقائد الاخريين:

الدولة المصرية تعدادها 110 مليون نسمه الغالبيه العظمي من الرقم ده اصحابهم علي ديانتي الاسلام و المسيحيه انت بقي ايه هدفك لما تشوه اي معتقدات او شرائع من الديانات دي و تخلي الناس العامه العاديين الي بنستهدف بحسن نيه نشر الفكر القومي منهم يخافوا منا و من الافكار المتطرفة دي.

وعشان نكون منصفين هنا نقصد الاسلام بالتحديد..انت كده عايز تنتشر ؟ انت كده عايز تنشر في كل بيوت المصريين الفكر القومي؟ انت كده دمك خفيف اصلا لما تقعد تسخر من ديانات الناس؟

انت بالظبط بتثبت الي بيحاول يقوله العيال الي بنشوفها علي الجروبات سواء جروبات التصميمات ولا الحروبات التانيه الي يروح حاطط لك صوره مقاتل عربي و تحت رجله رمسيس العيال دي شغلها الشاغل تكفرنا.

وانت بغباءك بتساعده و بتروج لفكرته و بتقويها لانه بكل بساطه هياخد عبطك ده و ينشره و يقول بوصوا القوميين مش قولنالكم مش بيحترموا اديان وتقتل الفكره والعامه من الناس تاخد جنب منا و من افكارنا الي هي ببساطه حريه و احترام جميع المعتقدات مسلم مسيحي يهودي ملحد يا جماعه الدين لنفسك الي يهمنا ولائك لدولتك بس.

فمعلش لو انت بفكر ده هتستمر في كده انت لا تمثلنا ولا بتمثل القوميه لانك خطر عليها و علي انتشارها الي الغرض منه ان احنا نقضي علي الدونيه الي انتشرت و نرجع الشباب تاني تحب بلادها الدونية الي انتشرت واتبررت بسبب الظروف .

براءه القومية من الاساءه للاديان:

مره تانيه وكلامي هنا لاي شخص لا ينتمي لاي تيار او فكر و سمع ان القومية معاده اديان... الكلام ده ظلم و كدب حتي و ان خرج من بعض الي حاسبين نفسهم جزء من التيار.. انك تكون قومي مش انك تحط لي صورة رمسيس و حورس و قناع توت عنخ امون و تمشي تسب لي في معتقدات غيرك.

القومية المصرية الحقيقية:

قوميتك هي انك تكون مسؤل و تقف جنب بلدك و تساعد غيرك من ابناء التيار في عوده الفكر ده لشرائح المجتمع المصري و تحترم معتقداته مهما كانت.

واخيرا التيار القومي المصري بيحترم كل الاديان الاسلام المسيحيه او غيرها و لو ملحد بردو ليه كامل الاحترام له حقوق زي ما عليه واجبات.

خاتمه:

وكمراجعه عامه لاي حد بيقرا عن القومية لاول مره او عايز يستكشف ابعادها القوميه المصرية هي ان تكون مأمن و مخلص بحب لبلدك و تراعي مصالحها و تحترم اديان ابناء البلد غير كده و اي حد يخرج عن الاطار العام لا يمثل غير نفسه هنا في قومي فيه المسلم و المسيحي ده العادي و الطبيعي اختلاف الاديان والاختلاف عاما دي سنه من سنن الحياه.

دينك بينك و بين ربك لكن هنا القوميه يهمها مدي ولائك و حبك لتراب البلد و اخلاصك ليها مهما كانت الظروف و انك تدافع عنها و عن مصالحها و تكون قضايا بلدك هي القضايا الاولي الي بتعير اهتمامك للدفاع عنها