هل كان اخناتون أول الموحدين؟

هل كان اخناتون اول الموحدين؟ كتير بنلاقي بوستات وتعليقات عن اخناتون، وقد ايه هو كان فيلسوف وحكيم، وانه حارب الكهنة الأشرار عشان ينشر عقيدة التوحيد، وعشان كده الكهنة انتقموا منه بعد موته، لكن ايه هي التفاصيل الحقيقية للموضوع؟ عشان نفهم العلاقة بين الدين والكهنة من ناحية والحكام والسلطة من ناحية تانية لازم نبص على الموضوع بأثر رجعي. النظرة العامة للملك في مصر القديمة انه ممثل النترو على الأرض -لو مش عارف النترو يا ريت تقرا مقال هل المصريين موحدين- لدرجة ان الملك هو الشخص الوحيد اللي كان ليه الحق يدخل قدس الأقداس في المعبد كل يوم، لكن عشان ده كان مستحيل ان الملك يتواجد في كل المعابد كل يوم، فاصبح للكاهن الاكبر استثناء يدخل قدس الأقداس بتفويض من الملك، قشطة؟ وخلال التاريخ حصل اكتر من مرة صراعات على السلطة بين كهنة كل نتر والتاني، لكن اللي كان مسيطر في الدولة القديمة هو النتر رع رب الشمس. بعد الأسرة السادسة والأخيرة من اسرات الدولة القديمة قامت الثورة الاجتماعية، وساعتها اتهزت صورة الملك قدام الشعب واتغيرت خريطة سيطرة الكهنة خلال الدولة الوسطى، من مدينة اون (المطرية) بتاعت رع في الشمال لمدينة واست (الاقصر) بتاعت آمون في الجنوب، وعمل كهنتها حركة صايعة جدا، ضافوا لاسم آمون اسم رع، فبقى اسمه الكامل آمون رع. عشان يجمعوا أكبر سلطة دينية ممكنة.

طب حرب السيطرة دي كانت بين الكهنة وبعضهم بس؟ لا! ساعات لما قوة الكهنة بتزيد قوي كانوا بيتحدوا الملك نفسه، او هم نفسهم بيبقوا ملوك، زي ملوك الأسرة الخامسة، اللي كانوا كهنة النتر رع. طب ايه علاقة كل ده باخناتون؟ هقولك؛ لما احمس طرد الهكسوس وأنشأ الأسرة ال١٨ والدولة الحديثة وارتفع نجمه، ارتفع معاه نجم آمون رع والكهنة بتوعه، ولما وصل للحكم الامبراطور العظيم تحتمس التالت اللي قضى الجزء الأول من حياته في المعبد، بقى بيقدم ببذخ شديد أملاك ضخمة لآمون رع، وبيشرف عليها الكهنة بتوعه، لدرجة ان معبد الكرنك كان بيخدم فيه آلاف الكهنة في وقت من الأوقات، متخيل! وصل للحكم بقى امون حتب الرابع اللي اتضايق جدا من سيطرة كهنة آمون، وشاف انهم ناس جشعة كل همهم الفلوس ومش في دماغهم عبادة ولا بتاع، الأزمة بينهم زادت جدا لدرجة انه أعلن الحرب عليهم، وساب الاقصر وراح عمل مدينة جديدة في المنيا سماها آخت آتون وغير اسمه لآخ إن اتن، ومعناه المخلص لآتون. طب مين هو آتون؟ آتون هو الطور التالت من الشمس الطور الأول (الفجر) اسمه خبر وده رمز الجعران الطور التاني (الضهر) اسمه رع رمز قرص الشمس والطور التالت (المغرب) هو آتون وده نتر موجود من زمان اخناتون ماخترعهوش ولا حاجة، وحتى في حربه على آمون وكهنته مأقصاش رموز النترو التانيين، يعني مكانش موحد بالمعنى المنتشر عالسوشيال ميديا. اخناتون كانت دماغه رايقة، قعد يألف في نصوص دينية وتراتيل واخترع نظام فني جديد وهو الواقعية الشديدة، اللي باظ منه بعد كده واتسم بالرمزية، زي ما بنشوف في تمثاله الشهير في المتحف المصري. طب هل اخناتون ده بقى ملك كويس ولا لأ؟ للأسف يا صديقي لأ! لأن اخناتون حط لحياته هدفين محددين، الأول عبادة اتون باعتباره الكاهن الأوحد (يعني لا ينوب عنه رئيس كهنة ولا حاجة) والتاني محاربة آمون وكهنته، وأثناء حربه دي انتشر الفساد والبلد باظت تماما لأن اخناتون أهملها، والأدهى من ذلك انه ضيع املاك الامبراطورية المصرية، لان كل الممالك على حدود الامبراطورية اللي عملها ملوك الاسرة ال١٨ العظما لاحظوا ضعف اخناتون، وانه في الطراوة، فمضيعوش الفرصة وقدروا ياخدوا الأمارات من مصر، واحدة ورا التانية. للأسف بعد اخناتون جي ملوك عظما زي امون محب، ورمسيس الأول، وسيتي ورمسيس التاني، لكنهم مقدروش يرجعوا حدود الامبراطورية المصرية تاني اللي ضيعها اخناتون. طبعا بعد موته الأزمة اللي افتعلها انتهت ورجع كهنة آمون رع سيطروا تاني على الأمور، وده كمان بسبب ان الديانة اللي روجلها اخناتون كان هو فيها الكاهن الاوحد، عشان كده ماستمرت بعد وفاته، وانتقم منه كهنة آمون أشد انتقام على اللي عمله فيهم. طبعا في الفترة اللي فاتت بقى في حملات ضخمة لتوكيد المصريين القدماء في الصورة النمطية للمؤمنين، عشان كده مروجي الحملات دي بيستخدموا اسم اخناتون بطريقة غلط عشان يثبتوا وجهة نظرهم، لكن الحقيقة يا صديقي قدمناهالك في المقال ده عشان تعرف ايه هي قصة اخناتون الحقيقية.