هوليود الشرق أسم كان بيطلق علي مصر من حوالي ٥٠ سنة بس ، نتيجة للثراء الفني والثقافي الي كان موجود علي أرض مصر.
أيه الي اتغير عشان ننزل من السماء وبدل ميزيد الإهتمام ونبقي منافسين عالمياً نزلنا سابع الأرض وبقا الفن المصري يخجل منه المصري نفسة.
علامات إستفهام كتيرة علي الي حصل
هنفصلهم سؤال سؤال ونحاول نلاقي ليه إجابات بس الأول هل الفن و الإعلام مؤثر للدرجادي ، ولو مؤثر أيه درجة التأثير ؟ مصطلح القوي الناعمة مصطلح سياسي شاع إستخدامة في الفترات الأخيرة من التاريخ بغرض التأثير علي الشعوب وفرض ثقافة ونمط معين عليهم دون الحاجة لوسيلة إكراه كعقوبات أو حروب.
وكل دول العالم الكبري ماشية بالنظام ده.
دولة زي الولايات المتحدة بقا عندها أكبر مركز للقوي الناعمة في العالم " هوليود " لما تحب تصدر فكرة او ثقافة لشعوب تانية بتصدرها بكل سهولة وترسخها في العقل كمان
زي مثلا فكرة إن الجيش الأمريكي جيش لا يقهر مع إن التاريخ بيقولنا إن الجيش الأمريكي كان بيعاني في أفغانستان وفيتنام وحالياً غير قادر علي فرض قوته علي روسيا . ولكن الصورة الي عند معظم شعوب العالم إن الجيش الأمريكي هو عم العالم ومحدش يقدر يجي عليه والأمثلة علي كدا كتيرة القوي الناعمة ممكن تكون وسائل إعلام ، أفلام ، مسلسلات ، موسيقي، رياضة وغيرة من الطرق الي أقدر أفرض بيها نفسي بدون سلاح.
هل مصر في فترة من الفترات قدرت تعمل ده ؟
الإجابة نعم بداية القرن الماضي ولحد السبعينيات كان مصر مسيطرة علي المنطقة العربية وقدرت تفرض ثقافتها ولهجتها علي شعوب المنطقة من خلال الأفلام والمسلسلات.
وقدرت حتي توصل ده لبعض دول أوروبا عن طريق الموسيقي والغناء " عبد الحليم حافظ وأم كلثوم وحتي عمرو دياب "
وكانت رائدة في المجال ده وليها كلمتها وده كان السبب الرئيسي أن اللهجة المصرية يستطيع أي شخص عربي يفهمها بسهولة عكس المصري بيجد صعوبة في فهم بعض اللهجات. مفيش شك أن الفن في مصر بدء يتراجع مع ظهور الحركات الإسلامية وتحريمها للفن بكل أشكالة والهجوم علي الفنانين بطرق بشعة ومع صمت الدولة ورضاها بالي بيحصل قدرت الجماعات دي تكسب وأفقدت مصر واحد من أهم أسلحتها "الفن"
وبقينا في ٢٠٢٢
مصر ملكة الكوميديا معندهاش قناة "كوميدية"
مصر أكبر بلد في العالم عندها مقومات سياحية معندها قناة سياحية تعرض ده
معندهاش قناة ثقافية
معندهاش قناة إخبارية دولية "زي دول جمبنا تاريخها الثقافي والإعلامي ميتعدهاش ال٣٠ سنة"
ده نتج عنة إستغلال بعض الدول في المنطقة التراجع الي حصل في مصر وقدرو يسحبو السجادة من تحت رجلينا وبقا ليهم الكلمة الأولي علي حساب مصر.
وبقا الفنانين بتوعنا وإرثنا الثقافي بيتسرق عيني عينك ومحدش بيتكلم لا وزير ثقافة ولا أي حد من المعنين عن الأمر ده . الإهتمام بالمجال ده مش بس مربح مادياً وهيدخل للبلد مليارات علي قد مهتقدر تفرض نفسك علي المنطقة وتفرض ثقافتك وإسلوبك وهويتك وإهماله بيفتح المجال لدول لا تمتلك هوية أو ثقافة أنها تتصدر علي أنها صاحبة الريادة علي حسابك . الحقيقة تأخر الدولة في تطوير والنهوض بمجال زي ده عليه علامات إستفهام كتيرة
ياتري هيا راضية بالي بيحصل ؟
بقي مشكلة أو مش عارفة أهمية الموضوع وخطورتة في نفس الوقت ؟ تبقي ساعتها المشكلة أكبر
الكلام مخلصش لحد هنا والأيام الجاية هنتابع معاكم كلام في نفس الموضوع لعل وعسي نلاقي أي إهتمام من الدولة بكده.
Comments