السؤال ده معقد شوية، وهقولكم على إجابة تفاجئكم، المصريين القدماء (الشعب العادي) نفسهم مكانوش عارفين هم موحدين ولا لا!
طب ازاي؟
الدين في مصر القديمة مكانش ليه نسخة واحدة فقط، وعشان نفهم الموضوع ده محتاجين نبدأ من الأول.
الانسان البدائي خالص من آلاف السنين قبل توحيد القطرين بييجي ٣٠-٤٠ ألف سنة، لما كان الانسان لسه بيكتشف العالم وعايش بنظام hunter-gathere
يعني بيصطاد ويجمع طعامه، لاحظ الانسان وقتها مخاطر كتير بتهدد حياته، زي الظواهر الطبيعية والحيوانات المفترسة، مع الوقت بدأ يعمل طقوس للحيوانات المفترسة عشان يأمن شرها، زي الكوبرا والذئب واللبؤة والعقرب وخلافه.
طب هل الانسان قدم الطقوس للحيوانات المفترسة بس؟ لا، قدمها كمان لحيوانات تانية زي البقرة مثلا، لأنها كانت قدمت للأسنان عطايا كتير، لبن، لحمة، جلد، جبنة، سمنة، قشطة، حتى عضمها كان بيستخدمه.
خلال آلاف السنين الانسان المصري استقر على ضفاف النيل، حوالي ١٠ آلاف سنة قبل الميلاد وبعدها اتعلم الزراعة وعاش في بيوت ومبقاش يخاف من الحيوانات زي زمان، لكن فضلت الفكرة موجودة، بقت الحيوانات دي ليها نظرة من التقديس والاحترام.
مع الوقت بقى لكل مقاطعة من مقاطعات مصر رمز (في الغالب حيواني) أو بقى اسمه معبود محلي.
"هنمشي شوية في التاريخ لحد ما الانسان بدأ يسأل اسئلة عميقة أكتر ويفكر الكون ده جي ازاي؟"
وساعتها ظهرت اكتر من نظرية للخلق، إجمالا النظريات دي بتنص على ان الأرض كانت كلها مياه وبعدين ظهر أول تل أرضي واسمه التل المقدس، وجم النترو!
النترو دول جمع نتر، ودي الكلمة اللي بتترجم دلوقتي إله.
وهنا جينا لمعضلة جامدة، ان الكلمة دي ملهاش ترجمة حرفية، لكن اليونانيين لما جم مصر ولقوا النترو دول، قالوا عليهم آلهة، لأن اليونانيين كان عندهم آلهة، أمال النترو دول ايه؟
ناس مصريين معجبهمش ان المصريين القدماء كانوا غير موحدين وحكموا على عصرهم بمقاييس عصرنا، ودي غلطة رهيبة، فحاولوا يبرأوا المصريين القدماء من التهمة دي، راحوا قالوا ان النترو دول ملايكة، وناس تانيين ربطوا بين النترو وبين الأنبيا وقالوا مثلا ان أوزير أو اوزوريس ده النبي ادريس، لكن للأسف يا صديقي كل ده هبد.
أمال النترو دول ايه بردو؟
كلمة نترو مفيش ما يعادلها في اللغات الحالية، لكن لو فسرناها، نقدر نقول انها (قوة عليا اتجسدت واتعبر عنها بشكل مادي ملموس)
ومع التطور في الفكر الديني بقى عندنا أساطير شعبية لكل الناس، وأسرار ميعرفهاش غير قلة من الكهنة وبس، الأسطورة الكاملة بتقول إن في إله خالق خلق الكون كله والنترو دول، هييجي وقت وكل الكون هيموت زي ما ابتدى والنترو دول هيموتوا هم كمان ويتبقى الخالق الوحيد، لكن دي أسرار حصرية زي ما قولنا.
فبقى كل منطقة ليها النتر المحلي بتاعها وبيعيدوله في العيد بتاعه والدنيا جميلة، واللي خلق كل ده إله خالق واحد محدش يعرفه.
هل عبد المصريون القدماء الحيوانات؟
الموضوع ممكن يكون مربك شوية، لأننا شفنا المصريين القدماء راسمين حيوانات على المقابر والمعابد، وخدوا حيوانات حنطوها، وده معناه انهم عبدوا الحيوانات،
"هنرجع تاني للنترو اللي اتكلمنا عنهم، ليه خدوا شكل حيوان؟ وهل ده معناه ان المصريين القدماء عبدوا الحيوانات؟"
إجابة قاطعة (لا معبدوش الحيوانات) طب ايه الدليل؟ ان عندنا واحد من اهم الرموز هو البقرة، اللي عبرت عن النترت (مؤنث نتر) حتحور. المصري القديم كان بياكل البقرة عادي؟ هل ده معناه انه كل النترت حتحور؟ لا طبعا.
طب ليه مثلها بشكل حيوان؟
هنا بقى لازم نفهم حاجة ان المصري القديم اعتقد ان الانسان عنده:
الجسد (غت)
الروح (با) ورسمها على شكل طائر براس انسان.
القرين (كا) والرمز بتاعه بيكون ايدين مرفوعين لفوق.
دول أهم ٣ مكونات للانسان (في غيرهم بس هنتكلم عنهم بعدين)
طب والنترو؟ عندهم بردو التلات مكونات دول.
لكن النترو ارسلوا قرائنهم للإنسان على شكل ملموس في الطبيعة (في الغالب حيواني) وكان المصري بيختار حيوان واحد من الفئة دي بمواصفات خاصة يحطه في المعبد ويتعامل باحترام ويتحنط لما يموت وبس، وده يعتبر تجلي للنترو، لكن مش هو النتر نفسه. قشطة؟
طب على أساس ايه اختار الانسان المصري رمز معين لكل نتر؟
تعالوا ناخد أمثلة:
١-أبو قردان
هو الحيوان اللي بيمثل قرين النتر تحوت سيد الحكمة، لأن فضلا عن كل الطيور اللي بتاكل المحصول، ده الطائر الوحيد اللي بيسيب الحبوب وبياكل الدود اللي في الأرض وبيساعد الإنسان، فخده المصري القديم رمز للحكمة.
٢- القطة
هي قرين النترت باستت، لأنها بتهاجم الفيران وتصطادها، وعشان كده بتحمي المحصول والحصاد من ضرر الفيران، ولما الانسان يلاقي المحصول اللي يكفيه هيكون سعيد، فبقت رمز للسعادة.
٣- البقرة
قرين النترت حتحور، لأنها بتدي الإنسان لوازم كتيرة جدا في الحياة ذكرناها في المقال فوق، فبقت رمز للعطاء والجمال والحب وكل حاجة حلوة.
٤- الجعران
خبر الطور الأول من الشمس وهم كالتالي (خبر شمس الفجر، رع شمس الظهر، آتوم شمس الأصيل والغروب) الجعران ده المصري القديم لاحظ انه بيعمل كرة من روث الحيوانات ويجرجرها ويحط فيها البيض بتاعه اللي بيفقس بعد كده ويخرج من الكرة دي خنافس صغيرة، فبقت رمز لتجدد الحياة خلال كرة الشمس (لأنها عامل اساسي لحياة البشر على الأرض وبدونها يموت الجميع)
٥- اللبؤة
قرين النترت سخمت سيدة القوة والحرب والحماية، طبعا مفهوم ليه.
٦- ابن آوي (فصيلة شبيهة بالكلاب والذئاب والثعالب)
قرين النتر آنوب (أنوبيس) لأن الحيوان ده بيفحر في الأرض وياكل الجثث، وده علم المصري القديم انه يحافظ على الجثث بطريقة أفضل فاتوصل لاختراع التحنيط وتأمين المقابر، فخذوه رمز للحماية، لكن لونوه بالأسود رغم ان لون الحيوان الحقيقي زي الكلب البلدي اسود في بني، لكنهم لونوه بالأسود لارتباطه بالموت.
وبكدة نفهم ان المصري القديم ماعبدش الحيوان لكنه قدم ليه معاملة محترمة واتعامل معاه انه خلق الإله اللي ربنا جعله سبب مهم للحفاظ على البيئة واتعامل معاه بطريقة راقية، وتأمل في الرسالة اللي ربنا وجهها للإنسان من خلال شركائنا في الطبيعة.
Comments